"Azərbaycanda ABŞ səfirinin təyin edilməsi Amerika administrasiyasının daxili işidir". Bu fikri dünən Azərbaycanın xarici işlər naziri Elmar Məmmədyarov rəsmi Bakının ABŞ səfirinin təyin edilməsinin yubadılmasına münasibəti haqqında suala cavab verərkən bildirib ("Turan").
Məmmədyarovun sözlərinə görə, ABŞ təkcə Azərbaycanda deyil, ATƏT də daxil olmaqla, bir sıra beynəlxalq təşkilatlarda da hələ səfir təyin etməyib.
Ümumilikdə ikitərəfli münasibətləri qiymətləndirən Məmmədyarov onları "geniş, hərtərəfli və normal" adlandırıb. Onun sözlərinə görə, ABŞ, demək olar, 20 ildir Azərbaycanın enerji layihələrini dəstəkləyir. "Bakı-Tbilisi-Ceyhan neft kəməri ABŞ-ın dəstəyi ilə həyata keçirilib", - deyə Məmmədyarov bildirib.
Nazir Moskvada ABŞ dövlət katibi Hillari Klintonun Rusiya Federasiyası xarici işlər naziri Sergey Lavrovla Qarabağ məsələsini müzakirə etdiyini məmnunluqla qeyd edib.
Qeyd edək ki, Məmmədyarovun müsbət qiymətləndirmələri son vaxtlar hökumətyönlü KİV-də Amerika əleyhinə başlanan təbliğata zidd səslənir.
|
