Azərbaycanı "Eurovision-2010" müsabiqəsində təmsil edəcək Səfurə Əlizadənin yeni veb-saytı yaradılıb. safura.eurovisiontalents.com saytında bu ilki təmsilçimiz, eləcə də ümumilikdə "Eurovision" müsabiqəsi ilə bağlı maraqlı məlumatlar yerləşdirilib.
Hazırda İsveçdə olan Səfurə Əlizadə ilə bağlı son xəbərləri məhz bu saytdan əldə etmək mümkün olacaq. Bu internet səhifəsində təmsilçimizin ən son fotosessiyaları, maraqlı çıxışları, səsyazma studiyalarında mahnı yazılışlarından foto və videolar yerləşdirilib. Saytda Səfurə Əlizadə ona ünvanlanan suallara da maraqlı cavablar verib:
"Mənim üçün xoşbəxtlik sevimli kitabları oxumaq və sevdiyim roman əsasında çəkilmiş filmə baxmaqdır. Mən bu kitabları hər zaman oxuya, ona çəkilmiş filmə hər zaman baxa bilirəm. Bax həmin anlarda mən özümü çox xoşbəxt hesab edirəm". Bu ilin mayında Azərbaycana qələbə qazandıracağını bildirən S.Əlizadə "Eurovision" müsabiqəsində ölkəmizi təmsil etməkdən qürur hissi duyduğunu dilə gətirib:
"Milli finalda qalib gələn zaman özümü Alisa möcüzələr ölkəsində hiss etdiyi kimi hiss etdim. "Eurovision" müsabiqəsi mənim həyatımda vacib hadisədir. Tək ona görə yox ki, gələcəyimi həll edə bilər. Həm də ona görə ki, mənə inanırlar, bu, böyük məsuliyyət və böyük sevincdir. İndi tək Azərbaycanın yox, eyni zamanda bütün Avropanın diqqəti mənə yönəlib. Mənə böyük şans verilib və bundan yaxşı istifadə etmək istəyirəm. "Eurovision" mənim hər zaman arzum və məqsədim olub. Məndən asılı olan hər şeyi edəcəyəm ki, ölkəmin vətəndaşları mənimlə fəxr etsinlər. Bu yarışmada qalib olmaq istəyirəm və indi məni bundan başqa heç nə maraqlandırmır". Məlumat üçün bildirək ki, saytda eyni zamanda yarışmada Azərbaycan təmsilçisinin ifa etməsi üçün əcnəbi bəstəkarlar tərəfindən təqdim olunan və Səfurə Əlizadənin ifasında İsveçdə lentə alınan mahnıların yeni variantı da yerləşdirilib. Bu saytdan həmin mahnıları yükləmək və dinləmək mümkündür.
Yeri gəlmişkən, onu da qeyd edək ki, "Eurovision-2010" Mahnı Müsabiqəsində ifa olunacaq mahnılarla bağlı səsvermə artıq başlayıb. İnternetdə tamaşaçı rəğbəti ilə bağlı aparılan səsvermənin nəticələrinə görə, Danimarka, Norveç və Azərbaycan ilk üçlükdədir. Bu ölkələrin ardınca isə İsrail, Xorvatiya və Almaniya favoritlər arasında gəlir. Türkiyəni təmsil edəcək "Manqa" qrupuna isə çox az şans verilir.
Qeyd edək ki, 55-ci "Eurovision" Mahnı Müsabiqəsində 39 ölkə - Azərbaycan, Albaniya, Almaniya, Belarus, Belçika, Bolqarıstan, Bosniya və Herseqovina, Böyük Britaniya, Yunanıstan, Gürcüstan, Danimarka, İsrail, İrlandiya, İslandiya, İspaniya, İsveçrə, İsveç, Estoniya, Ermənistan, Kipr, Latviya, Litva, Makedoniya, Malta, Moldova, Niderland, Norveç, Polşa, Portuqaliya, Rusiya, Rumıniya, Serbiya, Slovakiya, Sloveniya, Türkiyə, Ukrayna, Finlandiya, Fransa, Xorvatiya iştirak edəcəklər.
|
