Futbol üzrə Azərbaycan kubokunun bütün yarımfinalçıları müəyyənləşib - "Bakı", "Olimpik-Şüvəlan", "İnter" və "Xəzər-Lənkəran" yarışın əsas mükafatı uğrunda mübarizəni davam etdirəcəklər. Bununla da Azərbaycan kubokunda yeni qalibin olacağı dəqiqləşib. Çünki kubokun sahibi "Qarabağ" titulunu Lənkəranda "itirib".

"Xəzər-Lənkəran" Ağdam təmsilçisini rəqib meydanında vurulan bir qol hesabına keçib. Bu mərhələnin ən maraqlı və qalmaqallı oyunu da elə Lənkəranda baş tutub. "Qarabağ" öz meydanında 2:1 hesabı ilə qalib gəldiyi "Xəzər-Lənkəran"ın qonağı olub. Oyuna meydan sahibləri fəal başlayıb və 17-ci dəqiqədə Kristian Kabral fərqlənib. İkinci hissə futbolçuların kobud davranışı ilə yadda qalıb. Nəticədə matçın baş hakimi Vüsal Əliyev əvvəlcə Elnur Allahverdiyevi, sonra isə Rəşad Sadıqovu meydançadan qovub. Bu zaman bütün komanda hakimə etiraz edərək, oyunu dayandırmaq istəyib. Lakin Qurban Qurbanov futbolçularını meydana qaytarıb.

"İnter" isə "Neftçi" ilə hər iki kubok oyununu qələbə ilə başa vurub. İlk oyunda 0:3 hesablı məğlubiyyətdən sonra "Neftçi"nin "İnter"i üstələməsi çətin olub. Cavab qarşılaşmasında 1:2 hesabı ilə uduzan "flaqman" kubok uğrunda mübarizəni dayandırıb. Bununla da paytaxt təmsilçiləri arasında son 25 gündə keçirilən oyunlar seriyası başa çatıb.

Kubok uğrunda yarışın finalında paytaxt təmsilçilərinin iştirak edəcəyi rəsmiləşib. Bu, "Bakı"nın Sumqayıtda keçirilən görüşdə "Standard"ı 3:1 hesabı ilə məğlub etməsindən sonra gerçəkləşib. Öz meydanındakı 1:1 hesablı heç-heçədən sonra səfərdə qənaətbəxş nəticə əldə edən Bakı yarımfinala çıxmaqla, həlledici görüşdə paytaxt klubunun təmsil olunmasına şərait yaradıb. Belə ki, "Bakı" yarımfinalda digər paytaxt klubu - "İnter"lə üz-üzə gələcək. Bakı derbisində qalib komanda isə finalın iştirakçısı olacaq. Deməli, finalçılardan birinin paytaxt təmsilçisi olması şəksizdir.

Qeyd edək ki, ardıcıl üçüncü dəfədir finalda paytaxt klubu təmsil olunacaq. Son iki ildə həlledici qarşılaşmada Bakını "İnter" təmsil edib. Bu klub inişil "Xəzər-Lənkəran"a, ötən il isə "Qarabağ"a uduzub - müvafiq olaraq - 0:2 və 0:1.

Bu mərhələnin maraqlı məqamlarından biri "Olimpik- Şüvəlan"ın tarixində ilk dəfə yarımfinala vəsiqə qazanması olub.

Beləliklə, yarımfinal mərhələsində "Olimpik-Şüvəlan" - "Xəzər-Lənkəran" və "Bakı" - "İnter" qarşılaşmalarını izləyəcəyik. Yarımfinal oyunları aprelin 27-də və mayın 5-də keçiriləcək.

Azərbaycan kuboku, 1/4 final, nəticələr:

"Xəzər-Lənkəran" - "Qarabağ" - 1:0 (ilk oyun 1:2);

"İnter" - "Neftçi" - 2:1 (3:0);

"Olimpik-Şüvəlan" - "Simurq" 4:2 (penalti, 0:0);

"Bakı" - "Standard" - 3:1 (1:1).