Son zamanlar Rusiya-Azərbaycan istiqamətində hərəkət edən dəmiryol xəttinin Dağıstandan keçən hissəsində tez-tez təxribat xarakterli partlayışlar baş verir. Bu isə dəmiryol nəqliyyat vasitələrindən istifadə edən hər iki tərəf vətəndaşlarının narahatlığına səbəb olur.
Rusiya DİN-dən dəmiryolu xətlərinin polis orqanları tərəfindən ciddi mühafizə olunduğu bildirilsə də, təxribat xarakterli partlayışlar səngimək bilmir. Belə ki, mart ayının 11-də Rusiyanın Mahaçqala ətrafında növbəti dəfə dəmiryolunun partladılması nəticəsində 2 sərnişin qatarı dayandırılıb. Məlumata görə, Rusiya Dəmir Yollarının (RDY) yaydığı press-relizdə bu barədə bildirilir.
"Hadisə nəticəsində 373 saylı Bakı-Tümen və 374 saylı Tümen-Bakı qatarları dayandırılıb. Bütün sərnişinlər su və isti qidayla təmin olunacaqlar", - deyə press-relizdə qeyd olunur.
Partlayıcı qurğu martın 11-i axşam yük qatarının yolu üzərində işə düşüb. Tələfat yoxdur. Partlayış nəticəsində lokomotivlə birgə 14 vaqon relsdən çıxıb. Hadisə yolun Mahaçqala - Port-Tarku hissəsində baş verib. Hazırda hadisə yerində hüquq-mühafizə orqanlarının əməkdaşları işləyirlər.
RDY-nin məlumatına görə, dəmiryolunun sıradan çıxmış hissəsinin bərpasına hüquq-mühafizə orqanlarının müvafiq icazəsindən sonra başlanılacaq.
|
