Quba rayon sakinləri olan iş adamlarından hədə-qorxu yolu ilə pul tələb etməkdə ittiham olunan bir qrup jurnalistə hökm oxunub. Ağır Cinayətlərə Dair İşlər üzrə Məhkəmənin hökmü ilə Eldar Əsgərov, Şahlar Vəliyev 2 il, Nüşabə Qasımova 1 il şərti cəza alıblar.
Quba rayonundan olan iş adamları Bəxtiyar Məmmədov, Rüfət Qurbanov, Zəfa Məsimov, İsgəndər Hüseynov və Rövşən Babayev bir qrup jurnalistin onlara hədə-qorxu gələrək pul tələb etmələri barədə şikayət ərizəsi ilə DİN Baş Mütəşəkkil Cinayətkarlıqla Mübarizə İdarəsinə müraciət ediblər.
Araşdırma zamanı müəyyən edilib ki, özlərini jurnalist kimi təqdim edən Şahlar Vəliyev, Eldar Əsgərov və Nüşabə Qasımova qabaqcadan əlbir olub cinayət əlaqəsinə girərək, rayon ərazisində yerləşən yuxarıda adları çəkilən şəxslərə məxsus "Qübbə", "Ramin", "Qoşa çinar", "Əfsanə" və "Rüstəm" kafelərinin fəaliyyəti ilə əlaqədar rüsvayedici məlumatlar yayacaqları hədəsi ilə onların hər birindən 1000 manat tələb ediblər. Baş İdarəyə dəvət olunmuş Şahlar Vəliyev və Eldar Əsgərov öz izahatlarında törətdikləri əməlləri etiraf ediblər.
Araşdırmalarla məlum olub ki, Sumqayıt şəhər sakini Şahlar Vəliyev "Yeni Azərbaycan Dünyası", Şirvan şəhər sakini Eldar Əsgərov isə "Günəşli Azərbaycan" və "Qanun və gerçəklik" kimi əcaib-qəraib adlar (qəzet adı olaraq) daşıyan qəzetlərin baş redaktorları kimi jurnalist adına yaraşmayan, ona ləkə gətirən fəaliyyətlə məşğul olub, ayrı-ayrı vətəndaşlardan və iş adamlarından müxtəlif vaxtlarda hədə-qorxu ilə pul tələb ediblər.
|
