Güney - Ayna.az

İran teleradio şirkətinin sədri İzətulla Zərqövmi bu günlərdə jurnalistlərə demişdir ki, Tacikistan və Əfqanıstanla birlikdə Tehran fars dilində televiziya yaratmaq istəyir. Onun sözlərinə görə, bu TV Novruz bayramınadək fəaliyyətə başlayacaq: "Bunun yaranmasının vacib olduğu ilə bağlı danışıqlar aparılıb. Verilişlərin proqramı da artıq hazırdır. Proqramın böyük hissəsini İran tərəfi hazırlayacaq. Fikrimcə, iki dövlətin qadınlarının baş örtüksüz veriliş aparması birgə əməkdaşlığa əngəl olmayacaq".

Bu məsələ İran prezidenti Mahmud Əhmədinejadın əfqan həmkarı Həmid Karzayın dəvəti ilə Əfqanıstana səfəri əsnasında da diqqət mərkəzində olub.

Xatırladaq ki, 2008-ci ilin martında bununla bağlı İran, Tacikistan və Əfqanıstan xarici işlər nazirlərinin üçtərəfli danışıqlarında bu barədə razılıq əldə edilmişdi. İran teleradio şirkətinin sədri İzətulla Zərqövmi bununla əlaqədar Düşənbəyə səfər etmiş, ölkə prezidenti İmaməli Rəhmanla görüşmüşdü. İranlı qonaq demişdi:

"Tacikistanla İran teleradio şirkətləri arasında ikitərəfli əməkdaşlığın inkişaf etdirilməsi ilə bağlı çoxlu planlarımız var. Tacikistandan olan kadrların İranda uyğun universitetlərdə təhsil alması üçün hər cür şərait mövcuddur".

Əlbəttə, "farsdilli ortaq TV" ideyası normal olardı, fəqət "farsdilli dövlətlər TV-si" özlüyündə qəribə səslənir. Bir halda ki, Tacikistan əhalisinin az qala yarısı - özbək, Əfqanıstan əhalisinin az qala yarısı türklər (özbək, türkmən, qazax, qırğız, qarabağlı, türk-monqol mənşəli - xəzəreylər və s.) təşkil edir. İrana gəldikdə, bu ölkənin "farsdilli dövlət" kimi təqdim edilməsi, ən azından bu ölkə əhalisinin az qala yarısını təşkil edən türklərə hörmətsizlik kimi qəbul olunmuşdur. Belə çıxır ki, bu TV layihəsinin xərcinin yarısı bu üç ölkənin türk vergi ödəyicilərinin hesabına olacaq. İran əhalisinin yarısını (qoy lap İran rəsmilərinin etiraf etdikləri rəqəmlə - 33 faizi olsun) təşkil edən türklərin isə ölkə daxili üçün bir TV-si yoxdur. Ölkə daxilində efirə çıxmayan, yalnız Azərbaycan Respublikasına ucuz təbliğat materialları üfürən "Səhər TV" bu hesabdan deyil...