Dünən "Landmark" biznes mərkəzində Reportyorların Azadlıq və Təhlükəsizlik İnstitutunun "Azad Dalğalar" layihəsi çərçivəsində Azərbaycan teleradioyayım sahəsinin tənzimlənməsinə dair beynəlxalq konfrans keçirilib ("Turan").
Konfransda teleradio yayımı sahəsinin tənzimlənməsi, mövcud vəziyət və yanaşmalar, teleradio yayımının tənzimlənməsi üzrə qanunvericilik təşəbbüsləri, qanunvericilikdəki boşluqlar və təkliflər müzakirə olunub.
Layihənin koordinatoru Rəsul Cəfərov ümumrespublika telekanallarının monitorinqi üzrə nəticələrin xülasəsi haqqında məlumat verib. Ötən ilin may ayından başlayaraq, telekanallarda müvafiq siyasi fiqurlara ayrılmış vaxt çərçivəsində məlumatlar qiymətləndirilir, proqramlar təhlil edilir.
Telekanallar jurnalistlik vəzifələrindən ictimai hadisələrin tərəfsiz, obyektiv və ədalətli portretini yaratmaq üçün istifadə etmək əvəzinə, iqtidarı və daha çox prezident və onun ailəsini önə çəkmək məqsədilə hər bir məqamdan istifadə edirlər. İlham və Heydər Əliyevin şəkilləri aidiyyəti olmayan proqramlarda, süjetlərdə və reklamlarda göstərilir.
Publisist Mehriban Vəzir yerli telekanalların auditoriya baxımından vəziyyətinin kritik olduğunu bildirib. Onun sözlərinə görə, televiziya tamaşaçılarının əksəriyyəti xarici telekanallara baxmağa üstünlük verirlər. Regionlarda vəziyyət daha da ağırdır, belə ki, burada söz azadlığı və demokratiya yoxdur.
"Turan" Servisin direktoru Samir İsmayılov bildirib ki, ölkədə fəaliyyət göstərən yerli radioların verilişləri keyfiyyət və kəmiyyət baxımından çox aşağıdır. Əksər radioların veb səhifələri yoxdur.
Lakin İTV-nin ictimaiyyətlə əlaqələr departamentinin nümayəndəsi Tahir Məmmədov bu tənqidlərlə razılaşmayaraq, tənqidlərin çoxunun əsassız olduğunu qeyd edib. O bildirib ki, aparılan monitorinqin vahid üsulu yoxdur, qiymətləndirmələr isə emosional və subyektiv xarakter daşıyır.
Media Hüquqları İnstitutunun rəhbəri Rəşid Hacılı qanunvericilikdə mövcud olan boşluqlar məsələsinə toxunub. O, AzTV-nin fəaliyyətini kəskin tənqidə məruz qoyub. Onun sözlərinə görə, bu TV qanunsuz fəaliyyət göstərir.
|
