Dünən Milli Məclis Azərbaycanın insan haqları üzrə müvəkkilini seçdi. Bu məsələ ilə bağlı səsvermədə gözlənilməz heç nə baş vermədi. Ombudsman yenə də Elmira Süleymanova seçildi. Onun təqdimatını aparan millət vəkili Əli Hüseynov ümumilikdə ölkəmizdə insan haqları üzrə müvəkkillik institutunun yaradılmasını çox mühüm hadisə adlandırdı: "Məhz Elmira Süleymanova təsisatının qurulmasında, fəaliyyətində beynəlxalq ictimaiyyətdə tanımasında böyük rol oynayıb".
Ombudsman yaşlı və müdrik olmalıdır
Qüdrət Həsənquliyev ombudsman vəzifəsinə yaşlı insanın seçilməsinə tərəfdar çıxır. O dedi:
"Ombudsman bəlkə də yeganə vəzifədir ki, bura müdrik, yaşlı insan təyin olunmalıdır. İnsan anadangəlmə qabiliyyətli ola bilər, çox işləyə bilər. Amma müdriklik insana yaşla gəlir". Deputat dedi ki, bu təklifi komitədəki müzakirələr zamanı səsləndirəndə ona qarşı çıxanlar olub: "Dedilər ki, mən cavanların qarşısını alıram. Halbuki bu fikri deyənlərin yaşı Elmira xanımdan bir yaş artıq, ya əskik olardı. Mən Elmira xanıma qarşı aparılan kampaniyanı ədalətsiz hesab edirəm".
Ad layihədə təsdiqlənmiş halda parlamentə gəlib
Pənah Hüseyn isə yenə də Milli Məclisin saxtakarlığa yol verdiyini açıqladı. Dedi ki, deputatlara paylanan qanun layihəsində ombudsmanlığa namizədlərin adları yox, Elmira Süleymanovaya səs verilməsi təklif olunur:
"Bu nə biabırçılıqdır? Niyə parlamentə belə sənəd gəlib çıxır? Niyə insan hüquqları sahəsində tanınmış şəxslər - Novella Cəfəroğlu, Arzu Abdullayeva, Leyla Yunus, heç olmasa Qənirə Paşayevanın adları bu siyahıya salınmayıb. Axı biz o biri namizədləri heç tanımırıq. Əslində bu rejim şəraitində kim olursa-olsun, lap Pənah Hüseyn də insan hüquqlarını tapdandığı bu şəraitdə heç nə edə bilməz".
Pənah Hüseyn sözlərinə əlavə etdi ki, ombudsman ilk növbədə vicdan məhbuslarını azad etməlidir, nazirlərdən çəkinməməlidir, onlara zəng edərkən əli əsməməlidir: "İnşallah, rejim dəyişəndə, belə müvəkkil də olar".
Oqtay Əsədov müxalifətçi həmkarına "İnşallah, sənin bu arzun ürəyində qalar" cavabını verdi. YAP-çı deputat Siyavuş Novruzov da qanun layihəsinin Prezident administrasiyasında deyil, komitədə müzakirə əsasında hazırlandığını söylədi. Bu anda Pənah Hüseyn dözmədi və yerindən qışqıraraq "heç kimi aldatmaq lazım deyil, bu, birbaşa prezidentin göndərdiyi sənəddir" deyərək mübahisəni daha da qızışdırdı.
Ara bir qədər sakitləşəndən sonra S.Novruzov çıxışına davam etdi və adları çəkilən hüquq müdafiəçilərini SADVAL təşkilatçılarını, erməni terrorçularını, erməni mənşəliləri, separatçıları dəstəkləyən adamlar adlandırdı: "Onlar qaçqınlar haqqında heç yana bir dənə də məktub göndərməyiblər. Belə adamlara qəti şəkildə səs vermək olmaz. MM o adama səs verir ki, o adam Azərbaycan vətəndaşının hüququnu qoruyub və bunun dəfələrlə şahidi olmuşuq".
Nəhayət, ombudsmanlığa namizədlərin adları bir-bir səsverməyə çıxarıldı. Səsvermədə iştirak edən deputatlardan 106 nəfəri E.Süleymanovanı dəstəklədi. 7 deputat onun əleyhinə səs verdi.
İclasdan sonra jurnalistlərə müsahibə verən E.Süleymanova indiyə qədər hər kəsin hüquqlarını müdafiə etdiyini bildirdi: "Bundan sonra da təsisatımızı təkmilləşdirəcək, önəmli işlər görməyə çalışacağıq".
Ombudsman bildirdi ki, hazırda Bakı İstintaq Təcridxanasında saxlanan "Gündəlik Azərbaycan" və "Realnı Azerbaydjan" qəzetlərinin baş redaktoru Eynulla Fətullayevə baş çəkəcək. Qeyd edək ki, ombudsman vəzifəsinə namizədlər hazırkı ombudsman Elmira Süleymanova, Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin rəisi Faiq Qurbanov və BMT İnsan Hüquqları üzrə Ali Komissarlığının Azərbaycandakı təmsilçisi Teymur Məlikaslanov idi.
|
