Uzun sürən fasilədən sonra müğənni Xatirə İslam konsert proqramına hazırlaşır. Əvvəlcə dinləyicilərinə yeni mahnı təqdim edəcəyini deyən sənətçi xanım, daha sonra böyük səhnəyə çıxacaq:
"Yaxın bir neçə gün ərzində mənim yeni "Leyli və Məcnun" adlı mahnım təqdim ediləcək. Tezliklə isə mahnıya klip çəkdirəcəm. Qeyd edim ki, dahi Füzulinin bu əsərinə kino, tamaşa şəklində müraciət olunub. İstədim ki, bu adı mahnıda da yaşadım".
Klip çəkilişlərini bir qədər isti günlərə saxlayan sənətçi yaradıcı heyətin rahatlığını nəzərə alaraq belə düşündüyünü dedi. Konsert hazırlıqlarından söz salan müğənni proqram üzərində çalışdığından xəbər verdi. Bildirdi ki, onun növbəti musiqili layihəsinin təqdimatı Heydər Əliyev Sarayında planlaşdırılır. Əgər maddi durumu buna əl verməsə, o başqa məkan seçmək məcburiyyətində qalacaq:
"Əgər xatirinizdədirsə, bu konsert bir neçə ay öncə təqdim edilməli idi. Lakin səhhətim, ən başlıcası isə maliyyə çatışmazlığı üzündən layihəni dayandırdım. Bir qədər çalışıb, maliyyə imkanımı artırmağa qərar verdim. Çünki burada yeri icarəyə götürməkdən başqa, xərclər də var və bu külli miqdardadır".
|
