Quşçuluq fabriklərində böhran vəziyyəti davam edir. Quşçuluq cəmiyyətinin sədri Aydın Vəliyevin bildirdiyinə görə, müəssisələr tam gücü ilə işləyə bilmir. Maya dəyərinin istehsaldan yuxarı olması quşçuluq fabriklərini çıxılmaz vəziyyətdə qoyur. Aydın Vəliyevin sözlərinə görə, quşçuluqda istifadə olunan bütün məhsullar xaricdən gətirilir. İqtisadi böhranla əlaqədar olaraq isə, gətirilən quş yemləri üçün əlavə dəyər vergisinin ləğvi məsələsi gündəmdən çıxıb.
Söhbət əsnasında öyrəndik ki, yerli istehsalın satışında da problemlər var. Belə ki, yerli məhsul nisbətən baha olduğundan xaricdən gələn toyuq əti yerli malı sıxışdırır. Ötən il ölkənin quşçuluq fabriklərində 31 min tona yaxın quş əti, 800 milyon ədəd isə yumurta istehsal olunub.
Quşçuluq fabriklərində genetik modifikasiya olunmuş məhsullardan istifadə olunması iddialarına gəlincə, Aydın Vəliyev quşçuluq fabriklərində ancaq təbii qidalardan istifadə olunduğunu deyir:
"Toyuq əti 19 günə yox, 35 günə yetişdirilir. Bu da intensiv yemləmə hesabına başa gəlir. Toyuqlar 1,300 kq olanda onlar kəsilir. İranda, Türkiyədə bu çəkidə toyuqlar kəsilmir. Onlarda toyuq azı 2 kq çəkidə olmalıdır".
Aydın Vəliyev bildirdi ki, damazlıq yumurta da əsasən xaricdən - Hollandiya, Türkiyə, İran və digər ölkələrdən gətirilir. Damazlıq yumurtanın orta qiyməti isə 50-60 qəpik təşkil edir.
|
