Novruz bayramı ərəfəsində gündəlik tələbat mallarının, Novruz şirniyyatlarını hazırlamaq üçün lazım olan ərzaqların qiymət artımı gözlənilir. Gözlənilir deyəndə ki, prosesin artıq başladığını bazarlara üz tutanlar yaxşı bilirlər. Əslində bahalığın kökündə süni amillər dayansa da, əhali baş verənləri təəccüblə qarşılamır. Çünki hər il bütün bayramlarda eyni hadisələrin şahidi olur. Müvafiq dövlət qurumları süni qiymət artımı ilə mübarizə apardığını bəyan etsə də, həqiqət göz qabağındadır.

İqtisadçı ekspert Zahir Abdullayev baş verənlərə fərqli münasibət sərgiləyir. Onun sözlərinə görə, bayram ərəfəsində baş verən artımın iqtisadi əsası var:

"Bayramla əlaqədar olaraq gündəlik tələbat mallarında qiymət artımı təbiidir. Çünki bu zaman həmin mallara olan tələbat artır ki, bu da satıcılar tərəfindən qiymətlərin artırılacağını təxmin etməyə əsas verir. Əslində bu qiymət artımını süni artım kimi qəbul etmək düzgün olmazdı. Çünki bu zaman iqtisadiyyatın fundamental əsasını təşkil edən tələb-təklifin çoxalması məsələsi ortaya çıxır ki, qiymət artımı da məhz bu asılılıqdan irəli gəlir".

Ekspertin fikrincə, bayramqabağı qiymət artımının qarşısını köklü şəkildə almaq qeyri-mümkündür. Bu məqsədlə təşkil edilən yarmarkalar qiymət artımının qarşısını yalnız müəyyən qədər ala bilər. Ancaq bu tədbir də kifayət etmir ki, qiymətlər əvvəlki səviyyədə qalsın.