Futbol üzrə milli komandamız bu həftə 2012-ci Avropa çempionatının seçmə qrup mərhələsinə hazırlıq çərçivəsində növbəti yoldaşlıq oyununu keçirdi. Berti Foqtsun başçılıq etdiyi komandamız Lüksemburqda bu ölkənin yığma komandası ilə qarşılaşdı. Yığmamız bu dəfə səfərdə Lüksemburq millisini məğlubiyyətə uğratdı - 2:1. Bu, Azərbaycan yığmasının ardıcıl üçüncü qələbəsidir.
"Joze Bartel" stadionunda keçirilən matçda Fərid Quliyev əsas yığmamızın heyətində ikinci matçında fərqlənməyi bacarıb: o, 28-ci dəqiqədə rəqibin səhvindən məharətlə istifadə edib. Az sonra qapıçı Kamran Ağayev zədələndiyindən onu Fərhad Vəliyev əvəzləyib. Lakin F.Vəliyev 34-cü dəqiqədə Cef Ştrasserin cərimə zərbəsindən vurduğu topun qarşısını ala bilməyib. Bununla belə, millimiz buraxdığı qoldan 3 dəqiqə keçməmiş yenidən hesabda irəli çıxıb. Bu dəfə Elvin Məmmədov fərqlənib. Fasilədən sonra Saşa Yunisoğlu və Fabio Luis Ramimim də meydançaya buraxılıb. Lakin hesab dəyişməyib. Beləliklə, yığmamız tarixi ərzində Lüksemburqla keçirdiyi ilk oyunundan qələbə ilə ayrılıb. Qeyd edək ki, əvvəlki iki görüşdə millimiz Çexiya və İordaniyanı eyni hesabla məğlub edib - 2:0.
Matçdan sonra yığmamızın almaniyalı baş məşqçisi Berti Foqts oyunla bağlı fikirlərini açıqlayıb:
"Nəticədən razıyam, oyundan isə tam razı qalmadım. Çox çalışmağımıza, əziyyət çəkməyimizə baxmayaraq, baxımlı futbol nümayiş etdirə bilmədik. Öz klublarında az oynayan futbolçularla mayda keçirəcəyimiz təlim-məşq toplanışında ciddi söhbət edəcəyəm. Matça gəlincə, top saxlamaqda, qısa ötürmələrdə, sağ və sol cinahlarda zəiflik vardı".
Milli komandamız növbəti yoxlama matçını 2010-cu il dünya çempionatının iştirakçısı Honduras yığmasına qarşı keçirəcək. Artıq rəqib komandaya qarşı keçirəcəyi yoxlama oyununun yeri və təxmini tarixi müəyyənləşib.
İyunun 11-də Cənubi Afrika Respublikasında başlanacaq futbol üzrə növbəti dünya çempionatının final mərhələsinə hazırlıq məqsədilə millimizlə görüşəcək şimali amerikalılar həmin dövrdə Avropada səfərdə olacaqlar. Artıq hazırlıq planına aydınlıq gətirən honduraslılar yoldaşlıq oyunlarını da Almaniya və Avstriyada keçirmək fikrindədirlər.
Qeyd edək ki, Azərbaycan - Honduras matçının mayın sonları, iyunun əvvəlində Avropa ölkələrindən birində keçiriləcəyi elan olunub. Mayın 20-dən iyunun 4-dək Almaniya və Avstriyada məskunlaşacaq şimali amerikalılar bir sıra ölkələrin yığmaları ilə qarşılaşa bilər. Yeri gəlmişkən, matçın baş tuta biləcəyi bu iki ölkə Avro-2012-nin seçmə mərhələsində də yığmamızın rəqibləridirlər.
|
