Martın 5-də R.Mustafayev adına Azərbaycan Dövlət İncəsənət Muzeyində 8 Mart Beynəlxalq Qadınlar Gününə həsr olunmuş "Qadın ətri" təsviri sənət sərgisinin açılışı keçirilib. APA-nın xəbərinə görə, Mədəniyyət və Turizm Nazirliyi ilə Rəssamlar İttifaqı tərəfindən birgə təşkil olunan sərgi Hüseyn Cavidə məxsus "Bəşəriyyət qadınla yüksələcək" devizi altında keçirilir. Sərgidə xalq rəssamı Mikayıl Abdullayev, Oqtay Sadıqzadə, Toqrul Nərimanbəyov, əməkdar incəsənət xadimi Vəcihə Səmədova kimi sənətkarlarla yanaşı, Sakit Məmmədovun, Niyaz Nəcəfovun, Elşən Sərxanoğlunun və digər rəssamların əsərləri tamaşaçılara təqdim olunub. Açılış mərasimində Rəssamlar İttifaqının sədri, xalq rəssamı Fərhad Xəlilov, Bakı şəhər İH başçısının müavini Fidumə Hacıyeva, Qarabağ döyüşçüsü Gülarə Musayeva, Mədəniyyət və Turizm Nazirliyinin muzey sektorunun müdiri Azadə Hüseynova çıxış ediblər.
Bizi İsveçrədə "Bir addım" təmsil edəcək "Imrer Grour" Prodüser Mərkəzinin istehsal etdiyi "Bir addım" qısametrajlı bədii filmi İsveçrənin Friburq şəhərində beynəlxalq film festivalında Azərbaycanı təmsil edəcək. Mərkəzdən APA-ya verilən açıqlamaya görə, festival martın 13-də başlayacaq və martın 20-də yekunlaşacaq. "Bir addım" filmi 2009-cu ildə Mədəniyyət və Turizm Nazirliyinin keçirdiyi "Bu meydan, bu ekran - 2008" müsabiqəsinin qalib kino layihəsi kimi istehsal olunub. Filmin rejissorları Nərgiz Bağırzadə və Fariz Əhmədov, ssenari müəllifləri Alina Abdullayeva və Nərgiz Bağırzadə, quruluşçu operatoru Tarıverdi Tarıverdiyev, quruluşçu rəssamı Şahin Hüseynli, bəstəkarı Rauf Əliyev, prodüserləri isə Rəşad Qasımov və Fariz Əhmədovdur. Filmin bədii rəhbəri Cəmil Quliyevdir. Baş rollara Gülzar Qurbanova, Pərviz Məmmədrzayev və Nərmanə Kərimova çəkiliblər.
|
