"Gündəlik Azərbaycan" və "Realnıy Azerbaydjan" qəzetlərinin həbsdə olan baş redaktoru Eynulla Fətullayevin Bakı İstintaq Təcridxanasında saxlanma müddəti 2 ay da uzadılıb. Bu barədə "Turan"a jurnalistin vəkili Elçin Sadıqov bildirib.
Onun sözlərinə görə, bu, jurnalistin narkotik saxlaması ittihamı üzrə istintaqın yekunlaşmaması və istintaqın martın 28-dək davam edəcəyi ilə əlaqədardır.
Eyni zamanda, vəkil bildirib ki, son 15 gündə Fətullayev barəsində heç bir istintaq hərəkəti aparılmayıb. Müdafiə tərəfi və jurnalistin özü Apellyasiya Məhkəməsinə müraciət etmək və istintaq təcridxanasında qalma müddətinin uzadılmasına etirazını bildirmək niyyətindədir.
Qeyd edək ki, 8 il 6 ay müddətinə azadlıqdan məhrumetmə cəzası çəkən "Realnıy Azerbaydjan" və "Gündəlik Azərbaycan" qəzetlərinin redaktoru Eynulla Fətullayev narkotik vasitələrin yayılması ittihamı ilə yeni 3 ilədək azadlıqdan məhrumetmə cəzasına məhkum edilə bilər. Dekabrın 28-də jurnalistin saxlandığı cəzaçəkmə müəssisəsində əşyalarının arasından heroin tapılıb. Lakin redaktorun yaxın günlərdə onun işinə baxacaq Avropa İnsan Hüquqları Məhkəməsinin qərarı ilə həbsdən azad edilməsinə imkan verilməməsi üçün narkotik vasitənin onun əşyalarının arasına qəsdən qoyulduğunu hesab etməyə tutarlı əsasların olduğu deyilir.
|
