Siyasət - Ayna.az

Dünən ermənilərin Azərbaycanın Xocalı şəhərində törətdiyi soyqırımının 18 ili tamam oldu. Xatırladaq ki, 1992-ci il fevralın 25-dən 26-na keçən gecə erməni hərbi birləşmələri Rusiyanın 366-cı motoatıcı alayın köməyi ilə Xocalı şəhərini işğal edərək, burada yaşayan dinc əhaliyə - azərbaycanlılara qarşı soyqırım törədib.

Erməni silahlı birləşmələri SSRİ dövründən Xankəndi şəhərində dislokasiya olunmuş 366-cı motoatıcı alayının zirehli texnikası və hərbi heyətinin köməkliyi ilə 1992-ci il fevralın 25-də Xocalı şəhəri üzərinə hücuma keçib. Mühasirəyə alınan şəhərin 2500 sakini xilas olmaq üçün Ağdam istiqamətində hərəkətə başlayıb. Lakin pusquda dayanaraq dinc sakinləri gözləyən ermənilər onları gülləbaran ediblər. Əsrin faciəsi olan bu soyqırım aktı nəticəsində 63-ü uşaq, 106-sı qadın, 70-i qoca və qarı olmaqla - 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsindən 76-sı uşaq olmaqla 487 nəfər yaralanıb. 1275 nəfər əsir, 150 nəfər itkin düşüb.

1 aprel 1992-ci il tarixinə olan qiymətlərlə dövlətin və əhalinin əmlakına 5 mlrd. rubl dəyərində ziyan vurulub.

Xocalı soyqırımının ildönümü hər il olduğu kimi Azərbaycan və dünyanın bir çox ölkələrində hüznlə qeyd olunub.

Dünən saat 17.00-da Xocalı şəhidlərinin ruhu bütün ölkə ərazisində 1 dəqiqəlik sükutla yad edilib. Azərbaycan prezidenti İlham Əliyev 1992-ci il fevralın 25-dən 26-na keçən gecə erməni hərbi birləşmələrinin Xocalıda törətdiyi soyqırımı qurbanlarının xatirəsinə ucaldılan "Xocalı soyqırımı" abidə kompleksini ziyarət edib. APA-nın məlumatına görə, dövlət başçısı soyqırım qurbanlarının xatirəsini yad edərək, kompleksin önünə əklil qoyub. Mərasimdə Azərbaycanın dövlət və hökumət nümayəndələri, millət vəkilləri, diplomatik korpusun təmsilçiləri də iştirak ediblər. Xocalı soyqırımının 18-ci ildönümü ilə əlaqədar ölkənin tanınmış elm və mədəniyyət xadimləri, ziyalılar, ictimaiyyət nümayəndələri də abidə önünə gələrək, günahsız qətlə yetirilən insanların xatirəsinə hörmət və ehtiramını bildiriblər. Ziyarət axşam saatlarınadək davam edib.

Corc Vaşinqton Universitetində Xocalı qətliamına həsr olunmuş konfrans keçirilib. Konfrans Azərbaycan-Amerika Şurası (AAC), Azərbaycan-Amerika Cəmiyyəti (ASA), Türk-Amerika Assosiasiyaları Assambleyası (ATAA), Corc Vaşinqton Universitetinin Türk Tələbələr Assosiasiyası, Vaşinqtondakı Türk-Amerika Assosiasiyası (ATA-DC) və Azərbaycan-Amerika Tələbə Assosiasiyası (AASA) tərəfindən təşkil olunub.

Azərbaycanın ABŞ səfiri Yaşar Əliyev konfransda çıxış edərək bildirib ki, Xocalı 20-ci əsrdə dünyada baş verən ən böyük qətliamdır.

Amerika Azərbaycan Cəmiyyətinin sədri Tomris A

zəri, ABŞ Dövlət Departamenti tərəfindən seçilmiş musiqi səfiri və "Xocalıya ədalət" mahnısının müəllifi Toni Bləkmən və Grammy mükafatçısı Qordon Uilyams konfransda çıxış ediblər.

Tomris Azəri Xocalı qətliamının Azərbaycan kimliyinə təsiri barədə danışıb. O, Markar Melkonyanın "Qardaşımın yolu" adlı kitabından sitat gətirərək ASALA terroçusu Monte Melkonyanın dili ilə Xocalı cinayətinin etiraf edildiyini bildirib.

Toni Bləkmən və Qordon Vilyams Azərbaycanın Ağcabədi rayonunda qaçqın düşərgələrinə baş çəkmələrindən danışıblar.

"Xocalıya ədalət" klipinin təqdimatı tamaşaçılar tərəfindən maraqla qarşılanıb. Jurnalist və millət vəkili Qənirə Paşayeva tərəfindən Heydər Əliyev Fondunun dəstəyi ilə hazırlanan Xocalı haqqında sənədli film də tədbirdə nümayiş olunub.

Xocalı faciəsi qurbanlarının xatirəsi Polşanın paytaxtı Varşava şəhərində anılıb. APA-nın məlumatına görə, Azərbaycanın Polşadakı səfirliyinin təşkilatçılığı ilə Varşavanın mərkəzində yerləşən Jurnalistlər Evində Xocalı soyqırımının 18 illiyinə həsr olunmuş anım mərasimi keçirilib. Varşavada akkreditə olunmuş diplomatlar, Polşada təhsil alan yerli və xarici tələbələr, elm adamları və yerli media nümayəndələrinin qatıldığı tədbirdə Dağlıq Qarabağ münaqişəsi, Xocalı soyqırımı və 2008-ci ildən başlanmış "Xocalıya Ədalət" beynəlxalq maarifləndirmə kampaniyası barədə məlumatları özündə əks etdirən təqdimat marasimi keçirilib. Tədbirin sonunda "Xocalıya Ədalət" kampaniyasının manifest klipi göstərilib, iştirakçılara müvafiq təbliğat-təşviqat materialları paylanıb.

Dünən Buxarestdə Xocalı faciəsinin 18-ci ildönümü ilə bağlı Azərbaycanın Rumıniyadakı səfirliyi və Heydər Əliyev Fondu - Rumıniya nümayəndəliyi tərəfindən anma mərasimi keçirilib. Səfir Eldar Həsənov Xocalı faciəsinin Azərbaycanın unudulmaz, dəhşətli və qanlı günlərindən olduğunu söyləyərək, ermənilər tərəfindən törədilən qırğının ağır nəticələrindən danışmış, tədbir iştirakçılarına soyqırım aktının bir sıra dünya ölkələrində anıldığını bildirib.

Birləşmiş Ərəb Əmirliklərində də Xocalı soyqırımının 18-ci ildönümü münasibətilə tədbir keçirilib. Əbu-Dabi şəhərindəki "Samaya" otelində keçirilən mərasimdə ermənilərin Azərbaycan xalqına qarşı törətdikləri cinayətləri əks etdirən foto-stend təşkil olunub. İştirakçılara faciə haqqında sənədli film nümayiş etdirilib, ermənilərin Xocalıda törətdikləri vəhşilikləri əks etdirən kitablar paylanıb.

İKT-nin 6-cı sessiyasında qəbul olunmuş "Erməni silahlı qüvvələri tərəfindən dinc əhalinin kütləvi qətliamı" və "İnsanlığa qarşı cinayət" adlı qətnamələrin surəti səfirlik tərəfindən BƏƏ XİN-ə göndərilib.