Vəkillər Kollegiyasının üzvü Leyla Hüseynovaya qarşı soyğunçuluq etmiş paytaxt sakini Elnur Novruzovun cinayət işi üzrə məhkəmə prosesi başladı.
Təqsirləndirilən şəxs ötən il oktyabrın 10-da Yasamal rayonu, Ayna Sultanova küçəsi 5 ünvanında yerləşən hüquq məsləhətxanasına gələrək, özünü vəzifəli şəxs kimi təqdim edib və vəkil lazım olduğunu bildirib. O, hüquq məsləhətxanasında olanların fikrini yayındıraraq, orada Hüseynovanın pul kisəsini götürərək, aradan çıxıb.
Yasamal polisinin əməliyyat tədbirləri nəticəsində Novruzov hadisədən iki gün sonra həbs edilib.
Keçirilən prosesdə təqsirləndirilən şəxs ifadə verib. O, elan olunmuş ittiham üzrə özünü təqsirli bilmədi. Dedi ki, dörd universitet təhsili var və həmin universitetlərin diplomunu alıb. O, fırıldaqçılığın da peşəsi olduğunu qeyd edib: "Naxçıvanski adına Hərbi Məktəbi bitirmişəm. Zərgərəm, şampan zavodunda çalışmışam, proqramçı işləmişəm. Mən həm hüqüqşünas, həm artist, həm də fırıldaqçıyam. Bunlar mənim peşələrimdir".
Bu cinayət işi üzrə Ağır Cinayətlərə Dair İşlər üzrə Məhkəmədə araşdırma davam edir.
|
