Azərbaycanda dövlət ipoteka kreditləşməsinin miqyasının genişləndirilməsi məqsədilə bir neçə variant üzərində müzakirələr aparılır. "APA-Economics"in məlumatına görə, bunu Azərbaycan Mərkəzi Bankı İdarə Heyətinin sədri Elman Rüstəmov bildirib.
Onun sözlərinə görə, ipotekanın təkcə Azərbaycan İpoteka Fondu (AİF) hesabına artırılması bir qədər çətin olacaq: "Ona görə biz digər variantları da fikirləşirik ki, bunlar ipoteka mexanizmi və xarici mənbələrdən əlavə vəsaitin cəlb olunması variantlarıdır. Qlobal maliyyə böhranı ilə əlaqədar onları tapmaq və vəsait cəlb etmək imkanları məhduddur".
E.Rüstəmov bildirib ki, hazırda əlavə vəsaitin cəlb edilməsi üçün bir neçə xarici maliyyə təşkilatı ilə danışıqlar aparılır.
Qeyd edək ki, ötən ilin iyun ayında AİF tərəfindən 55 mln. manatlıq ipoteka istiqrazları buraxılıb və bu emissiya tam həcmdə yerləşdirilib. Cari ilin əvvəlində isə AİF 75 mln. manatlıq ipoteka istiqrazlarının emissiyasını həyata keçirib ki, hazırda bu məbləğin 9 mln. manatı yerləşdirilib.
|
