Heç vaxt özəl teatr yaratmaq fikrində olmadığını deyən xalq artisti Amaliya Pənahova özəl teatrların mənəviyyatdan, sənətdən uzaq olduğunu bildirib.
"Mənim yaratdığım Bələdiyyə Teatrı ilk gündən dövlətdən maliyyələşir. Özəl teatrı saxlamaq üçün yalnız pul qazanmağı düşünməlisən. Belə olan halda nə qəhrəmanlıq, nə sənət, nə də mənəviyyat yada düşəcək. Mən isə bunu bacarmazdım, çünki mən mənəviyyata çox önəm verirəm. Teatr mənəviyyata xidmət etməlidir", - deyən aktrisa səhnədə olduğu 45 il ərzində tamaşaları, rolları ilə yalnız mənəviyyata xidmət etdiyini vurğulayıb. Xalq artisti ANS PRESS-ə açıqlamasında onu da vurğulayıb ki, Bələdiyyə Teatrını yaradanda məqsədi yalnız mənəviyyata, gənclərin daxili aləminin zənginləşməsinə xidmət etmək olub: "Mən bunu öz gücümə edə bilməzdim, yəni özəl teatr olsaydıq, bir sıra problemlər ortaya çıxardı. Teatrımız düz 17 ildir dövlətin dəstəyi ilə bu amala xidmət edir. Özəl teatr olsaydıq, repertuarla müflisləşə bilərdik, aktyorların maaşını verə bilməzdik". Amaliya Pənahova Bələdiyyə Teatrının repertuarındakı komediyaların da mənəviyyata xidmət etdiyini əlavə edib. Şouların, əyləncələrin əleyhinə olmadığını bildirən teatr rəhbəri özəl teatrların bəzən bu cür təqdimatlara ehtiyac duyduğunu normal qəbul edir.
|
