Bu il yanvarın 3-4-də ölkənin cənub bölgəsində baş vermiş şiddətli qasırğanın nəticələri qismən aradan qaldırılsa da, sadə vətəndaşlara dəymiş ziyanın aradan qaldırılması istiqamətində bu günə qədər də addım atılmır. Bir neçə gün əvvəl təkrar baş verən qasırğa ziyan içində olan Lerikin düşdüyü ziyanların həcmini bir az da artırdı. Bu barədə "Ayna"ya qasırğa nəticəsində evinin damı uçulmuş Lerik şəhər sakini Yunus Ağayev məlumat verib.
"Yalnız mənim evimin 45-dən çox şiferini külək aparmışdı. Yağan yağış, qar, çovğun evin içindədir. Qonşularıma da ciddi ziyan dəyib. Bəzi qonşuların evlərinin, bəzilərinin tövlələrinin damı uçub, pəncərələrinin şüşələri qırılıb. Bu günə qədər də kimsə gəlib bizimlə maraqlanmayıb". Ağayevin sözlərinə görə, sakinlər onlara dəymiş ziyanla bağlı Lerik rayon İcra Hakimiyyətinə, rayon fövqəlada hallar komissiyasına rəsmi qaydada müraciət ediblər.
"Bu gün (dünən-red.) yenidən icra hakimiyyətində oldum və rayon fövqəladə hallar komissiyasının sədri Baləli müəllimlə görüşdüm. Mənə dedilər ki, göndərilən yardım yalnız məktəblərin və dövlət müəssisələrinin təmirinə çatıb. Əgər yenidən yardım göndərsələr, sizə də verəcəyik. Biz nə qədər gözləməliyik? Lerik dağ rayonudur və hazırda burada qar yağır", - deyə mənbə gileyləndi.
Lerik şəhər Fövqəladə Hallar Komissiyasının sədri Baləli Rzayev isə "Ayna"ya müsahibəsində bildirdi ki, əhaliyə dəyən ziyan aradan qaldırılır. "Mən şəxsən sizin qeyd etdiyiniz adamı yaxından tanıyıram. O, sadəcə, vaxtında müraciəti şəhər sovetinə verməli idi. O, şəhər soveti sədri ilə aralarında mövcud olan hansısa şəxsi münaqişəyə görə müvafiq qaydaya uyğun olaraq müraciətini etməyib. Buna baxmayaraq, biz yenə də ona kömək etməyə çalışacağıq", - deyə komissiya sədri vurğuladı.
Eyni zamanda, Lerikə dəymiş ziyanın aradan qaldırılması üçün kifayət qədər yardım ayrılmadığı da bildirilir. Hər halda, rayon fövqəlada hallar komissiyasının sədri bu barədə danışmasa da, yardıma möhtac, amma yardım almamış sakinlər bu fikirdədirlər.
"O gün ANS-də göstərirlər ki, hökumət bulvarda əkmək üçün bir ağacı hansısa xarici ölkədən 25 min dollara alıb gətirir. Nə qədər istəyirlərsə, Lerikdə uzunömürlü palıd, fıstıq ağacı var. Gəlib buradan çıxarıb aparıb əksinlər, o xaricilərə verdikləri pulları da camaatın evlərinin təmirinə sərf etsinlər", - deyə Y.Ağayev vurğuladı.
|
