ABŞ dövlət katibinin müavini Uilyam Berns Bakı görüşlərinin nəticələrindən məmnundur. "Bu gün prezident Əliyevlə görüşmək və vətəndaş cəmiyyətinin üzvləri ilə söhbət imkanı əldə etməyimdən məmnunam. Biz Azərbaycanla olan ikitərəfli münasibətlərimizi dəyərləndirir və dövlətinizin Əfqanıstan, terrorçuluqla mübarizə, regional və qlobal təhlükəsizlik sahəsində vacib olan digər məsələlərdə verdiyi dəstəyi yüksək qiymətləndiririk. Gələn illərdə biz bu və digər məsələlərdə münasibətlərimizin daha da genişlənməsinə və dərinləşməsinə ümid edirik", - deyə Berns jurnalistlər üçün keçirdiyi brifinqdə deyib ("Turan").
Berns bir qədər öncə Diplomatiya Akademiyasında dediyi fikirləri təkrarlayıb. Orada demişdi:
"Azərbaycanla qarşılıqlı əlaqələrimizin tarixi bir çox sahələrdə uzunmüddətli və məhsuldardır. Bakı-Tbilisi-Ceyhan kəmərinin diqqətəlayiq uğuru bu əməkdaşlıq ruhunun bariz nümunəsidir. Bu kəmər Xəzərin enerji resurslarını bütün dünyaya açdı. Bu və digər layihələr Azərbaycan iqtisadiyyatına da təkan verib və Azərbaycan xalqı üçün daha müstəqil iqtisadi gələcəyi təmin etməyə müvəffəq olmuşdur. Anladım ki, bəziləri ABŞ-la Rusiyanın enerji siyasətləri arasındakı rəqabətin Orta Asiyada növbəti Böyük Oyuna çevrilməsindən danışırlar. Bu yanlış düşüncədir. Baxmayaraq ki, enerji məsələlərində rəqabət elementləri həmişə var, hər hansı kommersiya sahəsində olduğu kimi. Birləşmiş Ştatlar hesab etmir ki, enerji təhlükəsizliyi sıfır ballı oyundur. Biz qətiyyətlə inanırıq ki, bir-birimizə qarşı getməkdənsə, birgə işləməklə daha çox nailiyyət əldə edə bilərik. Daha sıx qarşılıqlı əlaqələndirmə bütün ölkələrə xeyir gətirməklə, müxtəlif mənbələri və marşrutları maksimallaşdırır, daha yaxşı bazar qiymətini təmin edir və enerji ehtiyatlarının daşınmasındakı əngəlləri aradan qaldırır".
Berns vətəndaş cəmiyyətinin təmsilçiləri ilə görüşündə demokratiya və insan haqları ilə bağlı məsələlərlə maraqlanıb.
Görüşdə iştirak edən politoloq Hikmət Hacızadəyə bildirib ki, prezident İlham Əliyevlə söhbətində həbsdə olan bloggerlərin məsələsinə toxunub.
|
