Son aylar yeni yaradıcılıq işi ortaya qoymayan müğənni Xatirə İslam həmkarı Röyanın və Elarizin ünvanına qanqaraldan fikir söyləyib. Xatirə Röyayla bağlı suala belə cavab verib:
"Heç kimin bostanına daş atmaq istəməzdim. Amma belə fonoqramla konsert verməyə qalsa, onu hər gün edə bilərəm. Mənim konsertim klassik ifa, canlı orkestr işidir".
İfaçı hesab edir ki, şou-biznesdə onun atdığı addımları bir çox populyar müğənnilər təkrarlayır:
"Klip çəkdirirəm, darhal onun oxşarını çəkdirirlər. Hansı rejissora klip çəkdirmişəmsə, Röya da dərhal həmin rejissorla işləyib. Elariz isə lap qabağa gedib. Mənim "avtoş"lar haqda klipimdən sonra o da eyni addımı atıb".
Xatirə İslamın açıqlamasına Röya tərəfdən daha kəskin cavab gəldi. Röyanın mövqeyini qəzetimizlə bölüşən prodüseri Kənan əvvəlcə sözünə "Xatirə bekarçılıqdan nə danışdığını bilmir", - deyə başladı:
"Bəzi müğənnilər bekarçılıqdan danışırlar. Məhərrəmlik ayıdı, toy, efir yoxdu. Güclərini boş ittihama yönəldiblər. Şou-biznes qaydalarından başı çıxan da danışır, başı çıxmayan da. Xatirə İslam unudub ki, Heydər Əliyev Sarayında dəfələrlə konsert verən estrada ulduzlarından biri Röyadır. Onun konserti həm klassik, həm də müasir mahnılardan ibarət olub. Sarayda 50 illik stajı olan peşəkarlar çalışır. Belə çıxır ki, biz kimisə aldadıb, sarayda fonoqram ifaya yol açmışıq. Orada böyük aparatlar quraşdırılır və səsi idarə edən heyət var. Röyanın və hər hansı bir müğənninin çıxışı diqqət mərkəzindədir", - deyə Kənan bildirdi.
Onun sözlərinə görə, Röyanın digər məkanlarda da konsertləri canlı keçib:
"Bizim silsilə konsertlər teatrlarda da təşkil edilib. Bunların hamısında Röya canlı oxuyub. Əgər kimsə canlı ifa ilə fonoqramı ayıra bilmirsə, bu onun savadsızlığına dəlalət edir. Ola bilsin ki, həmin müğənnini danışmağa vadar edən səbəb həmin konsertə dəvət alanlar sırasında olmamasıdır".
Xatirənin Röyanı klip rejissorlarına müraciətdə onu təkrarladığı fikrinə də Kənan münasibət bildirdi:
"Elə bir rejissor tanımıram ki, Xatirə ona ilk klip çəkdirən müğənni olsun. O da kimdən sonrasa həmin rejissorla işləyib. Belə çıxır ki, kimisə təkrarlayıb. Əgər onun məntiqi ilə ayaqlaşsaq, hər müğənniyə bir rejissor, bir səs idarəedicisi lazım gəlir. Bu cür qaydalar isə hələ bizdə tətbiq olunmayıb".
Xatirənin Elariz haqqında söylədikləri də cavabsız qalmadı. Elariz bildirdi ki, o, Şahin Zəkizadəyə çəkdirdiyi klip efirə gedəndən sonra Xatirənin eyni mövzuda klipini izləyib. Amma buna qədər həmkarının ekran işi barəsində xəbərsiz olub. Oxşarlığın olduğunu etiraf edən Elariz bunu öz ayağına yazmaq istəmədi. Xatirənin klipinin rejissoru Kənan M.M. olub. Burada müğənninin yox, rejissorun təkrarçılığından söhbət gedə bilər. Lakin mən Şahin Zəkizadə adından danışa bilməyəcəm".
|
