Əməkdar artist Elza Seyidcahanın qeyri-adi təqdimatları davam edir. Müğənni yaxın aylarda misli görünməyən layihəyə imza atmaq niyyətindədir. O, layihə çərçivəsində başını keçəl qırxdıracağını da qərarlaşdırıb:
"Bu layihə haqqında uzun cümlələrlə danışa bilməyəcəm. Çünki layihənin oğurlanacağından ehtiyat edirəm. Bu cür hadisələrlə rastlaşdığım üçün ehtiyatı əldən vermək istəmirəm. Layihə musiqili olacaq və Azərbaycanda təşkil ediləcək. Bu qənaətə gəlmişəm ki, saçlarımı layihəyə qurban verim. Yəni başımı keçəl qırxdırmaq barədə düşünürəm".
Elza Seyidcahanın "Ekologiya ili" ilə bağlı mayda təqdim edəcəyi konsertin hazırlıqları isə davam edir. Öyrəndik ki, yaxın günlərdə bu məqsədlə ağacəkmə kampaniyası keçirəcək.
"Bu kampaniyaya bir çox sənət dostlarımı cəlb etməyi düşünürəm. Əslində ağaclar artıq əkilməli idi. Lakin planlaşdırdığımız vaxtda havalar qeyri-sabit keçdi, qar yağdı. Aksiyanın vaxtını bu səbəbdən irəlidəki günlərə keçirdik", - deyən Elza xanım estarda ulduzlarını konsert proqramına da cəlb edəcəyini bildirdi.
|
