Bir müddət əvvəl ANS televiziyasında həyat yoldaşı, teleaparıcı Rövşən Cahangirovun müəllif olduğu "Marş" adlı vətənpərvər verilişə aparıcılıq edəcəyi barədə açıqlama verən Elnarə fikrindən vaz keçib. Müğənni aparıcılıqdan imtina edib. Rövşən Cahangirovun mətbuatda həyat yoldaşının bu layihədə uğurla təmsil olunacağını bildirdiyi halda, Elnarə bu ideyadan daşındı. Xəbərə aydınlıq gətirən Elnarə bunları dedi:
"Bildiyiniz kimi, mən ANS telekanalında "El bilir ki" verilişinə aparıcılıq etmişəm. Lakin analıq məzuniyyətimə görə veriliş müvəqqəti dayandırılıb. Yaxın vaxtlarda bunu bərpa etməyi düşünürük. Layihənin hələ bir müddət də yaşamasını istəyirik. Amma ikinci verilişə aparıcılıq edə bilməyəcəm. Buna həm fiziki güc lazımdır, həm də vaxt. Bildiyiniz kimi, iki övladım var və onlara qayğı da mənim üçün önəmlidir".
Bir verilişlə kifayətlənmək fikrində olan müğənni həyat yoldaşının onun bu qərarından incimədiyinə əmin olduğunu bildirdi:
"Həm də düşünürəm ki, ailəlikcə, bir kanalı zəbt etməyəcəyik ki? Bir veriliş Rövşən, bir veriliş isə mənim üçün kifayətdir".
|
