"Rabitə" "Azərreyl"in qisasını aldı

Bakının qadınlardan ibarət "Rabitə" klubu Avropa Voleybol Konfederasiyası (CEV) kuboku uğrunda yarışın 1/4 finalında ilk görüşünü keçirib. Komandamız Bakıda Türkiyənin "Əczaçıbaşı" komandası ilə qüvvəsini sınayıb.

Bu görüş həm də bir növ revanş xarakteri daşıyıb. Belə ki, İstanbul klubu ötən ay bu yarış çərçivəsində keçirilən 1/8 final oyunlarında Bakının digər klubu - "Azərreyl"i mübarizədən kənarlaşdırmışdı (3:2; 3:0). "Rabitə" isə Türkiyə klubuna qalib gəlməklə, ölkəmizin ən titullu klubunun "qisası"nı alıb: "Rabitə" - "Əczaçıbaşı" - 3:0 (25:20; 27:25; 25:16).

Oyunun əvvəlində üstünlüyə yiyələnən komandamız ilk setdə asanlıqla qələbə qazanıb. İkinci setdə isə voleybolçularımız çətinliklə üzləşiblər. Lakin rəqib komanda təzyiqi artıraraq hesabı bərabərləşdirib. Buna baxmayaraq, "Rabitə" ikinci seti də öz xeyrinə başa vurub. Növbəti setdə də rəqibə məğlubiyyət acısı daddıran paytaxt klubu cavab oyunu ərəfəsində böyük üstünlük qazanıb.

Fevralın 24-də İstanbul qarşılaşmasında "Əczaçıbaşı"ya bir setdə qalib gəlmək kifayətdir ki, "dördlər finalı"na vəsiqə "Rabitə"yə verilsin. Bu matçla bağlı maraqlı bir faktı da oxucularımızın diqqətinə çatdırmaq istərdik. "Rabitə" - "Əczaçıbaşı" görüşündə tamaşaçıların sayı baxımından ən yüksək göstərici qeydə alınıb. Belə ki, "Sərhədçi" Olimpiya İdman Kompleksində baş tutan oyunu 3000 tamaşaçı izləyib. Halbuki bu mərhələnin digər qarşılaşmalarına üst-üstdə 4500 tamaşaçı baxıb.

Digər oyunların nəticələri:

"Yamamay" (İtaliya) - "Şverimer" (Almaniya) - 3:2 "Dinamo" (Serbiya) - "Srvena Zvezda" - 0:2 "Voley 2004" (Rumıniya) - "Uraloçka" (Rusiya) - 1:3.