Futbol üzrə 2010-cu il dünya çempionatının seçmə qrup mərhələsində çıxışını başa vuran milli komandamız yaxın günlərdə yenidən mübarizə meydanına atılacaq. Futbolçularımız fevralın 25-də İordaniya komandasına qarşı yoldaşlıq görüşü keçirəcək. Matç komandamızın fevralın 25-dən martın 1-dək Əmmanda təşkil olunacaq təlim-məşq toplantısı çərçivəsində baş tutacaq. Bu, Berti Foqtsun başçılıq etdiyi yığmanın 2010-cu ildə ilk sınağı olacaq. Almaniyalı baş məşqçi bu görüşdə iştirak üçün 22 futbolçuya dəvət göndərib. Milliyə çağırılanlar arasında yeni adlara da rast gəlmək mümkündür. Amit Quluzadə, Fərid Quliyev, Əfran İsmayılov və Rauf Əliyev debütant sayılırlar.
Gözlənilənlərin əksinə olaraq "Simurğ"un 30 yaşlı hücumçusu Elşən Məmmədov milli komandaya çağırılmayıb. Uzun fasilədən sonra kapitan Rəşad Sadıqovu heyətə qaytaran Foqts əvəzində ölkədən kənarda çıxış edən futbolçularımıza - Mahir Şükürovla Vaqif Cavadova dəvət göndərməyib.
Hollandiyanın "Tvente" klubuna transfer olduqdan sonra zədələnən Vaqifdən fərqli olaraq, "Anji"də (Rusiya) oynayan Mahirin belə problemi yoxdur. Ancaq Foqts əvvəl yığmada oynamaqdan imtina edən, sonra isə sözünü geri götürən Mahiri İordaniyaya aparmayacaq. Bu da "Anji"nin həmin vaxt futbolçunu buraxmaması ilə bağlıdır.
M. Şükürovun martın 3-də Lüksemburq yığması ilə səfərdə keçiriləcək yoldaşlıq görüşünə yollanması nəzərdə tutulur.
Qeyd edək ki, Azərbaycan və İordaniya yığma komandaları indiyədək bir dəfə qarşılaşıblar. 2004-cü ilin avqustunda keçirilən görüş 1:1 hesabı ilə başa çatıb.
Yeri gəlmişkən, Berti Foqts Lüksemburq yığması ilə keçiriləcək yoldaşlıq matçı üçün heyəti açıqlayıb. O, səfərdə baş tutacaq oyunun hazırlığına 24 futbolçunu cəlb edəcək. B.Foqts İordaniya yığması ilə keçiriləcək görüş üçün açıqlanan heyətlə müqayisədə, bu dəfə yarımmüdafiəçi Mahir Şükürov və hücumçu Vaqif Cavadovu da komandaya dəvət edib.
Qeyd edək ki, İordaniya - Azərbaycan qarşılaşması Əmman şəhərində fevralın 25-də Bakı vaxtı ilə saat 20:00-da başlanacaq.
|
