Həftəsonu Unibank Premyer Liqasında təsnifat mərhələsinə yekun vurulacaq və çempionatın medalları uğrunda mübarizə aparan altı komandanın tam siyahısı bəlli olacaq. Ötən həftəsonu isə Unibank Premyer Liqasının final mərhələsində mübarizə aparacaq daha bir komandanın adı məlum olub. "İnter", "Xəzər-Lənkəran", "Qarabağ" və "Bakı"nın ardınca "Neftçi" də adını güclülər sırasına yazdırıb. Altıncı pillədə qərarlaşan "Qəbələ" də böyük ehtimalla ilk altılıqda yarışacaq. Ancaq bu, şənbə və bazar günləri XXII turun oyunlarından sonra məlum olacaq.
Ötən turda maraqlı cəhət bundan ibarət olub ki, 6 oyunun 5-i heç-heçə nəticələnib. Yalnız bir oyunda meydan sahibləri qələbə qazanıblar. "Simurğ" Zaqatalada "Olimpik-Şüvəlan"a qalib gələrək, altılığa düşmək şansını qoruyub. "Qəbələ"nin Salyanda "Muğan"ın müqavimətini qıra bilmədiyi isə "Simurğ"un güclülər sırasını düşmək şansını artırıb. "Qarabağ"ın liderliyə yüksəlməsi üçün əlverişli şansı olsa da, "İnter" buna imkan verməyib.
Turun nəticələri: "Simurğ" - "Olimpik-Şüvəlan" - 2:0, "Karvan" - "Bakı" - 1:1, "Standard" - "Turan" - 1:1, "Muğan" - "Qəbələ" - 0:0, "Neftçi" - "Xəzər-Lənkəran" - 0:0, "Qarabağ" - "İnter" - 1:1.
Ötən il avqustun 14-də startı verilən XVIII milli çempionatımız ilk mərhələsini bu gün və sabah XXII turla başa vurur. Son tur altılığa sonuncu vəsiqə sahibinin hansı komanda olacağı baxımından daha çox maraq doğurur.
6-cı "xoşbəxt vəsiqə" ya "Qəbələ", ya da "Simurğ"a qismət olacaq. Amma nəzəri baxımdan çempionatın medalları uğrunda mübarizə aparacaq altılığa düşməyə "Qəbələ"nin daha çox şansı var. Hər halda, Ramiz Məmmədovun baş məşqçi olduğu komandaya istəyinə çatmaq üçün autsayder "Standard"la ev oyununda heç-heçə oynamaq kifayətdir. Bu zaman "Simurğ"un səfərdə "Turan" üzərində qazandığı qələbə nəticə verməyəcək. Çünki bu komandaların xalları bərabər olarsa, reqlamentə görə yaxşı oyunlar əsas götürülür. İlk dövrədə doğma meydanında "Simurğ"u 2:1 hesabı ilə məğlub edən "Qəbələ" səfər matçında heç-heçə edib - 1:1. 20 fevral: "Olimpik - Şüvəlan" - "Qarabağ", "Bakı" - "Muğan";
21 fevral: "Xəzər-Lənkəran" - "Karvan", "Qəbələ" - "Standard", "Turan" - "Simurğ", "İnter" - "Neftçi".
|
