Güney Azərbaycanın Qəzvin Universitetinin 10 tələbəsi bu ali məktəbdən qovulub. "Mehr" agentliyinin xəbərinə əsasən, daha 20 tələbənin şəxsi işinə baxılır. Onlar prezident seçkisinin rəsmi nəticələrinə etiraz aksiyalarına qatılmaqda suçlanırlar. Universitetin məsullarından biri Əbdüləli Əlbui də olayı təsdiqləyərək deyib ki, 10 tələbə ilə bağlı universitetin inzibati komitəsində ilkin hökm çıxarılıb, ancaq bu qərara yenidən baxıla bilər.
İrandakı inqilabın 31-ci ildönümü günü İrandakı "ayandenews" adlı saytın bütün əməkdaşları ETTELAAT məmurları tərəfindən tutulub. "Yaşıllar"a bağlı olduğu bildirilən "nidayi-səbzi-azadi" adlı saytın əməkdaşlarının da tutulduğu haqda xəbər yayılıb.
Ötən həftə bir qrup ABŞ senatoru insan haqlarını kobud şəkildə pozduğuna görə İrana qarşı daha kəskin sanksiyaların qəbulu ilə bağlı konqresə qanun layihəsi təqdim edib. Əslində İran hakimiyyətinə qarşı bu yöndə təzyiqlərin artması daha məntiqi görünür. Çünki insan haqlarının qorunması məsələsi heç bir dövlətin daxili işi sayılmır.
"GünAzTV"nin xəbərinə əsasən, insan haqlarının müdafiəsi ilə məşğul olan bir qrup hüquq müdafiəçisi BMT-nin Cenevrədəki İnsan Haqları Şurasına müraciət edərək, bu yöndə İrana qarşı basqıları artırmağı istəyiblər. Onlar bu qurumdan İranda insan haqlarının qorunmasını və ya pozulmasını öyrənmək üçün BMT təmsilçilərindən, yaxud təşkilatın mandatı ilə müşahidəçilər göndərilməsi ilə bağlı müraciət ediblər.
Müraciətçi arasında Beynəlxalq Əfv Təşkilatı, İrana dair Beynəlxalq İnsan Haqları Kampaniyası, Dünya Tələbələr Assambleyası, "Hanı mənim səsim" kimi təşkilatların təmsilçiləri də var. Onlar Nyu-Yorkda, BMT baş ofisinin qarşısında inqilabın 31-ci ildönümü günü İslam Respublikasında etiraz aksiyası keçirənlərlə həmrəylik nümayiş etdirmək üçün tədbir gerçəkləşdiriblər. Tədbirdən sonra keçirdikləri mətbuat konfransında beynəlxalq ictimaiyyəti İran hakimiyyətinə qarşı təzyiqləri gücləndirməyə çağırıblar.
İnsan Hüquqları Beynəlxlaq Təşkilatı İranın Təhlükəsizlik Qüvvələrini azından 30 nəfərin ölümünə, seçkidən sonrakı etiraz aksiyalarında 4 mindən çox iştirakçının tutulmasında suçlayıb.
|
