Xalq artisti, beynəlxalq müsabiqələr laureatı, tarzən Ramiz Quliyev Ankara Dövlət Türk Milli Orkestrinin dəvəti ilə fevralın 19-dan martın 2-dək Türkiyənin Ankara, İstanbul, İzmir və Şanlıurfa şəhərlərində solo konsertlə çıxış edəcək. Həmin orkestrin müşayiəti ilə Ramiz Quliyevin ifasında Azərbaycan və xarici ölkə bəstəkarlarının əsərləri, Azərbaycan muğamları səslənəcək. Konsertlərdə orkestrə Türkiyədə yaşayan həmyerlimiz, istedadlı musiqiçi Abdulla Qurbani dirijorluq edəcək. Türkiyədə eyni zamanda Ramiz Quliyevin Azərbaycan Mədəniyyət və Turizm Nazirliyinin dərs vəsaiti kimi nəşr etdirdiyi "Azərbaycan bəstəkarlarının əsərləri" məcmusunun təqdimatı da nəzərdə tutulub. Bununla bərabər, Ramiz Quliyevin Türkiyə ali musiqi təhsil ocaqlarında ustad dərsləri də keçiriləcək. Türkiyə səfərindən sonra tarzənin İranın Tehran və Şiraz şəhərlərində təşkil olunacaq 25-ci Beynəlxalq Musiqi Festivalında iştirakı gözlənilir.
|
