Nəcəf bəy Vəzirov adına Lənkəran Dövlət Dram Teatrı qarşıdakı aylarda bir sıra yeni tamaşalar təhvil verəcək. Teatrın builki repertuarında həm klassik, həm də müasir əsərlər yer alıb. Teatrın direktoru İslam Həsənovun məlumatına görə, baş rejissor Şekspirin "Kral Lir" pyesi üzərində çalışır:
"Bu ilin 4-cü rübündə teatrsevərlərə tamaşanı təqdim edəcəyik. Qriqori Qorinin "Herostratı unudun" pyesi də öz səhnə həllini tapacaq. Kamran Nəzirlinin "Şeytanın işığı" tamaşası Mədəniyyət və Turizm Nazirliyinin sifarişi ilə hazırlanacaq. Çalışırıq ki, həm müasir, həm də klassik əsərlərə müraciət edək". Öyrəndik ki, hazırda teatrda qırğız yazıçısı Ç.Aytmatovun "Gün var əsrə bərabər" romanının motivləri əsasında "Manqurd" tamaşasının məşqləri gedir. Əsərə quruluşu Sumqayıt teatrının baş rejissoru, əməkdar artist Firudin Məhərrəmov verir. Rejissorun fikrincə, bu bəşəri əsər bütün dövrlərlə səsləşir: "Biz burada əsasən Manqurd hissəsini önə çəkdik. Keçmiş və indiki gün baxımından aktual mövzudur. Ona görə Manqurd bölümünü götürdük. Qeyd edim ki, Ç.Aytmatovun əsərləri çox çətin səhnəyə gəlir. Amma teatr kollektivi ilə maraqlı tamaşa hazırlaya bilmişik".
|
