Fevralın 12-də Bakı Apellyasiya Məhkəməsində hakim Qail Məmmədovun sədrliyi ilə bloggerlər Adnan Hacızadə və Emin Millinin şikayətinə baxılması prosesi növbəti - 4-cü dəfə təxirə salınıb. Bu dəfə dinləmələrin təxirə salınmasına Emin Millinin Ağır Cinayətlərə Dair İşlər üzrə Məhkəmədə keçirilən prosesdə iştirak edən vəkili Elton Quliyevin gəlmədiyi səbəb olub. Bununla əlaqədar Hacızadənin vəkili İsaxan Aşurov hakimdən prosesi təxirə salmağı xahiş edib ("Turan").

Öz növbəsində hakim Məmmədov "prosesi uzatmağın mənası olmadığını" deyib və onun sözlərindən məlum olub ki, şikayətə baxılmasını başa çatdırmaq niyyətindədir. Bununla belə, hakim müdafiə tərəfin xahişini təmin edib və iclası 17 fevral saat 15:00-a qədər təxirə salıb.

Müttəhimlər məhkəməyə gətirilmişdi, lakin "zərərçəkmişlər" yenə də yox idilər. Xatırladaq ki, yanvarın 8-də iş üzrə zərərçəkmiş kimi keçən Babək Hüseynov və Vüsal Məmmədov iştirak etmədiyi üçün iclas təxirə salınmışdı.

Yanvarın 22-də iclas vəkil Aşurovun xəstəliyi ilə əlaqədar baş tutmadı. Fevralın 5-də məhkəmə iclasının təxirə salınmasına səbəb güclü qar yağması ilə əlaqədar müttəhimlərin məhkəməyə gətirilə bilmədiyi olub. Bloggerlər Adnan Hacızadə və Emin Milli 2009-cu il noyabrın 12-də xuliqanlıq ittihamı ilə 2 və 2,5 il müddətinə azadlıqdan məhrum ediliblər. Onlar iyulun 8-də Bakının mərkəzində "Lebanez" kafesində dava salmaqda və guya Babək Hüseynov və Vüsal Məmmədovu döyməkdə ittiham olunublar.