Müğənni Xəyyam Nissanov Birləşmiş Ştatlardan Bakıya dönüb. Kommersiya məqsədi ilə okeanın o tayına uçan sənətçi vətənə önəmli təkliflərlə qayıdıb. Orada bir sıra görüşlər keçirən sənətçi yaxın günlərdə böyük layihələrə imzasını atacaq. Bu barədə məlumatı qəzetimizə onun prodüseri Murad Arif verib. Təklifləri konkretləşdirən Murad Arif Xəyyamın ABŞ-ın bir sıra məşhur səsyazma studiyalarının nümayəndələri ilə görüşlər keçirdiyini diqqətə çatdırdı:
"Həmin şirkətlər bu gün dünya ulduzları ilə çalışır. Tərəflərin danışıqları Xəyyam Nissanovun mahnı yazdırıb, albom çıxarmasından ibarət idi. Daha sonra böyük konsert proqramının təşkili üçün diasporumuzun adamları ilə görüşlər keçirmişik". Murad Arif Xəyyamın səhnəni tanınmış musiqiçilərlə bölüşəcəyini istisna etmədi.
Murad Arifin sözlərinə görə, konsert layihəsinin həll dövrü keçdiyi üçün bəzi məsələlər dəqiqləşməyib. Bu səbəbdən konkret fikir söyləyə bilmədi. Yalnız öyrənə bildik ki, konsertin yaz, yaxud da yay aylarına təşkili nəzərdə tutulub. Sonra qeyd etdi ki, Amerikada yaşayan və bir müddət əvvəl Brilyant Dadaşovanın klipində tərəf-müqabil olan həmyerlimiz, bəstəkar və cazmen Aslanla da əməkdaşlıq yaradıcılıq planlarına daxildir:
"Xəyyam üçün nəzərdə tutulan planlar çoxluq təşkil edir. Onun ABŞ-da klipinin çəkilməsi barədə danışıqlar baş tutub. Bu barədə fevralın 10-da keçirəcəyimiz mətbuat konfransında bir az da dəqiqləşmiş fikirlərlə danışacağıq".
Sonda öyrəndik ki, mətbuat konfransında Xəyyamın DVD-si, saytı və söz, musiqisi Murad Arifə məxsus olan və əməkdar artist Tünzalə Ağayeva ilə birlikdə duet şəklində ifa edilən "Ürəyimsən" adlı klipin də təqdimatı nəzərdə tutulub.
|
