Mərhum xanəndə, xalq artisti İslam Rzayevin həyat yoldaşı Tamara Ağamalıyeva müğənni Xatirə İslamın haqqında gileyləndi. Dedi ki, həyat yoldaşının adını soyadı kimi daşıyan Xatirə bir ildir onun qapısını açmır.
"İslamın sağlığında Xatirə bizə tez-tez gəlirdi. İslamın səhhəti ilə də maraqlanırdı. Lakin ölümündən sonra ayağını qapıdan kəsdi. Heç telefon açıb, mənim əhvalımı da xəbər almır", - deyən Tamara xanım onun yadlaşmasının səbəbini anlaya bilmədiyini söylədi.
Onun fikrincə, əgər müğənni İslamın adını daşıyırsa, onu unutmamalıdır:
"Lakin Xatirə sağlığında İslamın adından bəhrələndi. İndi isə gözləyirəm, bəlkə tələbələrindən biri gəlib məni həyat yoldaşımın qəbri üstə aparar. Bunu ən çox da Xatirədən gözləyirdim. Amma Rövşən Əziz adında tələbəsi hamısından mərhəmətli çıxıb".
Lakin Xatirə İslam Tamara xanımın dediklərini təkzib edərək, özünü vəfasız adlandırmaq istəmədi.
"Mən Tamara xanıma 3 ay əvvəl baş çəkmişəm. Düzdür, get-gəlişim əvvəlki kimi deyil. Çünki o ocaqda İslam müəllimi görə bilmirəm. Amma İslam müəllimin ailəsini tamamilə unutmamışam".
İslam Rzayevin Xatirə İslama bağışladığı qaval ətrafında da söhbətlər dolaşır. Bu barədə xanəndənin bacısı Safura Səlimova daha sərt danışıb.
"İslam ömrünün son günlərində onun üçün qiymətli nə var idisə - lent yazıları, sədəf qavalı, arxiv şəkilləri hamısını qızım Arzuya verdi. Arzunu, demək olar ki, İslam qardaşım böyüdüb. İslam qavalını Xatirəyə birdəfəlik bağışlamamışdı. Necə olur ki, Aygün Bayramova kimi savadlı tələbəsi dura-dura qavalını başqa tələbəsinə bağışlayır? Onun üçün ən qiymətli sədəf üzərində adı həkk olunan qavalıdır ki, onu da qızım Arzu qoruyur".
Xatirə isə öz növbəsində bildirdi ki, qavalı ölümündən sonra İslam müəllimin ailəsinə bağışlayıb: "İstədim ki, ona məxsus olan qiymətli əşya müəllimimin ocağında qalsın".
|
