Nyu-Yorkda yaşayan soydaşımız Bakıda xatirələrini təzələyib. 12 il əvvəl Azərbaycanı tərk edən soydaşımız Nailə Əzizi (Nailə Beydullayeva) artıq bir neçə gündür Bakıdadır. Xatırladaq ki, Nailə Əzizi vaxtilə bəstəkar Vaqif Gərayzadənin rəhbərlik etdiyi caz-folklor ansamblının tərkibində çalışıb. O həm klassik, həm də folklor janrlarında ifa texnikasına malik sənətçidir. Nailə Əzizi 1986-cı ildə Vaqif Gərayzadənin "Bayatılar" video çarxında Alim Qasımovla duetdə çəkilib. Hazırda Nyu-Yorkda yaşamaqla, orada "Melodiya" qadın xorunda çıxış edir. Nailə xanım uzun illər sonra yenidən xalq artisti Alim Qasımovla duet ifa etmək istəyir. O, arzusunu reallaşdırmaq üçün Alim Qasımovla görüşüb, danışmaq fikrindədir. Öyrəndik ki, xorda oxumaqdan başqa vokal dərsi deyən Nailə Əzizi səs tellərində problemləri olan müğənnilərə dərs vermək sistemini yaradıb. Hazırda amerikalılar üçün "Şərq üslubunda mahnı oxumaq texnikası" dərs vəsaiti üzərində işləyir. Nailə xanım etiraf edir ki, qürbətdə yaşayandan bəri patriot olduğunu anlayıb. Bu səbəbdən Vətəndən uzaqda Azərbaycan musiqisini təbliğ etməklə məşğuldur. Söhbətinin davamında Nyu-Yorkda Azərbaycan Mədəniyyət Mərkəzi yaratmaq planlarının olduğunu da bildirib:
"Əvvəllər Azərbaycanı tərk etməyimə görə peşman idim. Lakin illər mənə bu peşmançılığı unutdurdu. Köhnə Bakı üçün çox darıxmışdım. Səfərimin ilk günlərində xatirələrimi təzələmək üçün metroya minmək istədim. Bəzi stansiyalarda yenidənqurma işləri aparılıb. Yeni görünüş xoşuma gəldi, lap muzeyləri xatırladır. Paytaxtda aparılan yeniliklər də gözdən qaçmır. Bakı günü-gündən müasirləşir. Mən bura qayıdanda başqa cür düşünürdüm. Lakin burada gördüklərim düşüncələrimi dəyişdi".
|
