Respublikada və xarici ölkələrdə bir sıra layihələr həyata keçirməyi düşünən bəstəkar Gövhər Həsənzadə daha bir yeni ideya ilə çıxış edib. O, fanatlar klubu açmaq niyyətinə düşüb. Hazırda fankulubun hazırlıq işləri görülür. Bu barədə bəstəkarın mətbuat əlaqələndiricisi Ceyran Nəriman məlumat verib.
Xəbərdə qeyd olunur ki, bu həftədən etibarən "Nika" adlanan fanklub fanatların, şou əhlinin, media mənsublarının ixtiyarına veriləcək. "Nika" fanklubunda bir çox təqdimat mərasimlərinin keçirilməsi nəzərdə tutulur:
"Fanklubunda təkcə Gövhər Həsənzadənin fanatları deyil, şou-biznesə aidiyyəti olan istənilən şəxsin fanatları toplaşıb, öz kumirləri ilə görüş keçirə bilər. Bu klubda həmçinin Gövhər Həsənzadənin əcnəbi qonaqları ilə də görüşlərin təşkili planlaşdırılır". Fanklubun "Nika" adlandırılması da təsadüfi deyil. Yunan mifologiyasına görə, Nika - qələbə deməkdir. Mətbuat katibi deyir ki, Gövhər Həsənzadə maraqlı layihələri ilə fərqləndiyindən, ona tapşırılan hər işin öhdəsindən uğurla gəldiyindən məhz bu adı seçib:
"Hər bir uğurlu işin nəticəsi qələbə sayıldığından bu ad fanklub üçün layiqli bir addır. Nika Gövhər Həsənzadənin qızı Nilgünün də qısaldılmış adı ilə bağlıdır".
|
