Azərbaycan Beynəlxalq Universitetinə (ABU) və digər ali məktəblərə qanunsuz yolla tələbə qəbul etdirməkdə ittiham olunan Binəqədi rayon Polis İdarəsinin keçmiş əməliyyat müvəkkili Müşfiq Muradovun və ABU-nun rektoru Elşad Abdullayevin qardaşı Mahir Abdullayevin katibəsi olmuş Bənövşə Hacıyevanın apellyasiya şikayəti üzrə məhkəmə prosesi keçirilib.
Təqsirləndirilən şəxslər 2005-ci ildə bir qrup şəxslə cinayət əlaqəsinə girərək, ABU-ya Tələbə Qəbulu üzrə Dövlət Komissiyasından kənar tələbələr götürülməsinə başlayıblar. Onlar əvvəlcə tələbələri Dağıstanda olan universitetlərdən birinə qəbul etdirməyi, sonra isə ABU-ya köçürüləcəyini vəd ediblər.
Təqsirləndirilən şəxslər 2005-2007-ci illər ərzində 100-dən çox vətəndaşı aldadaraq, pullarını mənimsəyiblər. Zərərçəkmişlərin şikayətindən sonra təqsirləndirilən şəxslər DİN Baş Mütəşəkkil Cinayətkarlıqla Mübarizə İdarəsinin əməkdaşları tərəfindən yaxalanıblar.
Ağır Cinayətlərə Dair İşlər üzrə Məhkəmədə CM 178.3.1-ci (mütəşəkkil dəstə tərəfindən dələduzluq etmək) maddəsi ilə ittiham olunan Muradovun 4 il müddətinə azadlıqdan məhrum etmə, Hacıyevanın isə 3 il şərti cəza alması barədə hökm çıxarılıb. Hacıyeva məhkəmə zalından azadlığa buraxılıb. Həmin hökmdən narazı qalan təqsirləndirilən şəxslər apellyasiya şikayəti veriblər.
...Bakı Apellyasiya Məhkəməsində təqsirləndirilən şəxslərin apellyasiya şikayətinə baxılıb. Muradovun barəsində çıxarılmış hökm dəyişdirilib və ona 2 il 6 ay müddətinə azadlıqdan məhrumetmə cəzası təyin edilib. Hökmün digər hissəsi isə qüvvədə saxlanıb. Lakin Muradov həmin qərardan Ali Məhkəməyə kassasiya şikayəti edib. Ali Məhkəmə onun şikayətini təmin edib və işin yenidən apellyasiya instansiyasında baxılması barədə qərar qəbul edib.
Bakı Apellyasiya Məhkəməsində Ali Məhkəmənin həmin qərarı üzrə təqsirləndirilən şəxslərin apellyasiya şikayətinə təkrar baxılıb. Hakim Sahibxan Mirzəyevin sədrliyi ilə keçirilən prosesdə qərar elan edilib. Prosesdə məlum olub ki, Muradov apellyasiya şikayətindən imtina etdiyi barədə məhkəməyə məktub göndərib. Həmin məktuba əsasən hakimlər apellyasiya şikayətinin baxılmasına xitam veriblər. Digər təqsirləndirilən Hacıyeva isə məhkəmənin hökmü ilə razılaşıb.
|
