Zorlamada təqsirli bilinən Davud Vəzirov, Firuz Eyyubov, Famil Eyyubov və Cavid Əmirovun cinayət işi üzrə məhkəmə prosesi başladı. Təqsirləndirilən şəxslər CM seksual xarakterli zorakılıq hərəkətləri (150.2.1, 150.2.3, 150.3.3) maddələri ilə ittiham olunurlar.
İttihama görə, 2009-cu ilin sentyabrında Qaradağ rayonu Korgöz qəsəbəsinin sakini, 1992-ci il doğumlu Davud Vəzir oğlu Vəzirov 9 yaşlı qonşusu Samiri (ad şərti verilib) qaranlıq bir yerə apararaq, onu zorlamışdır.
Azyaşlının hadisədən xəbər tutan valideynləri Vəzirovdan "qisas" alıblar. Azyaşlı oğlanın atası, 1974-cü il doğumlu Firuz Məhərrəm oğlu Eyyubov, əmisi, 1978-ci il doğumlu Famil və yaxın qohumları Cavid adlı şəxslər Vəzirovu maşına əyləşdirərək, qəsəbədən kənar bir yerə gətiriblər. Orada həmin şəxslər Vəzirovu əvvəlcə döyərək, ölümcül hala salıblar. Daha sonra onlar növbə ilə Vəzirovla cinsi əlaqədə olublar.
Baş vermiş hadisə ilə bağlı Vəzirov Qaradağ rayon Polis İdarəsinin 38-ci polis bölməsinə müracət edib. Hər iki tərəf şikayətçi olublar və zərər çəkdiklərini iddia ediblər. Lakin istintaq orqanı hər iki tərəfi təqsirkar bilib və işin istintaqını yekunlaşdıraraq, baxılması üçün məhkəməyə göndərib. İndi müttəhimlər kürsüsündə hər iki tərəf qanun qarşısında cavab verməli olacaq.
Bu cinayət işi üzrə Ağır Cinayətlərə Dair İşlər üzrə Məhkəmədə hazırlıq iclası keçirildi. Hakim Əhməd Quliyevin sədrliyi ilə keçirilən prosesdə məhkəmə baxışı fevralın 11-nə təyin edilib. Prosesin qapalı keçiriləcəyi bildirilir.
Ağır Cinayətlərə dair İşlər üzrə Məhkəmədə zorlamada təqsirli bilinən daha bir dəstəyə hökm oxunub. Gəncə şəhər sakinləri - Asif Hüseynov, Vüsal Əsgərov 5 il 6 ay müddətinə azadlıqdan məhrum ediliblər. Digər təqsirləndirilən Elşad Quliyevə isə 2 il icbari cəza təyin edilib.
Təqsirləndirilən şəxslər 2009-cu il iyunun 22-də 18 yaşlı Samirəni (ad şərti verilib) zorlayıblar. Onlar daha sonra 14 yaşlı Elmanı (ad şərti verilib) zorlamışlar. Zərərçəkmişlərin şikayəti əsasında təqsirləndirilən şəxslər Gəncə şəhər polisinin əməkdaşları tərəfindən yaxalanmışlar.
|
