Müdafiə Nazirliyinin "N" saylı Hərbi Hissəsinin əsgəri, qəsdən adam öldürməkdə ittiham olunan Elmar İsrafil oğlu Sadıqovun cinayət işi üzrə məhkəmə prosesi başladı.
Tovuz rayon Hərbi Komissarlığı tərəfindən həqiqi hərbi xidmətə çağırılan Elmar Sadıqov Cəbrayıl rayonu Cocuqmərcanlı kəndində yerləşən "N" saylı hərbi hissədə əsgəri xidmətdə olub. O, xidmətdə olarkən 2009-cu il aprelin 10-da, 12-də və 24-də saat 02-dən 04-dək əsgər yoldaşı Ramiz Ənvər oğlu Daşdəmirovun onun posta dəbilqəsiz və zirehli gödəkcəsiz gəldiyi barədə bölük komandirinə məlumat verməsindən, habelə komandirin posta gəlməsini ona xəbər vermədiyindən əsəbləşib. Postu tərk edərək, Daşdəmirovun bədəninin müxtəlif nahiyələrinə yumruq və təpik zərbələri vuraraq, ona işgəncə verib. Sadıqov Daşdəmirovu döydükdən sonra onunla cinsi əlaqədə olmaq istədiyini deyib. O, cinsi orqanını Daşdəmirova göstərərək, onu zorlayacağı ilə hədələyib.
Bundan başqa, Sadıqov həmin il mayın 17-də əsgər Rza Ənvər oğlu Mehdiyevlə birlikdə döyüş postunda olduğu müddətdə müşahidə məntəqəsinin qarşısında kölgəlik düzəltmək qərarına gəlib. O, taxta dirəklər gətirməkdən ötrü postdan 90-95 metr aralı yerləşən və hərbi qulluqçular arasında "besedka" adlanan yerə gedib. O, taxta dirəkləri döyüş postuna gətirərək, müşahidə məntəqəsinin qarşısında kölgəlik düzəltdiyi zaman postda xidmət aparan Mehdiyevi qəsdən öldürmək qərarına gəlib. Sadıqov əlində olan avtomat silahı Mehdiyevə tuşlayaraq, onu açdığı atəşlə qətlə yetirib.
Bundan sonra Sadıqov törətdiyi ağır cinayətdən yaxa qurtarmaq və şübhələri özündən yayındırmaq məqsədilə cinayətin üçüncü şəxs tərəfindən törədilməsini səhnələşdirmək qərarına gəlib. O, bu məqsədlə özünü də sol ayağından vuraraq yaralayıb. O, daha sonra qətlə yetirdiyi əsgəri səngərə ataraq, ermənilərin açdığı atəş nəticəsində öldürülməsini səhnələşdirib. O, Mehdiyevin müyitini səngərdə qoyaraq, əsgərlərin olduğu yerə gedib və ermənilərin atəş açdığını bildirib. Ön cəbhədə atəşkəsin pozulmasını provokasiya etməklə, hadisə yerində cinayətin izinin itirilməsinə cəhd edib...
Cinayət işi üzrə təqsirləndirilən şəxs qismində ifadə verən Sadıqov elan olunmuş ittiham üzrə özünü qismən təqsirli bilib. O, əsgər yoldaşı Ramiz Daşdəmirovu vurduğunu və mayın 17-də, saat 17.00 radələrində postu özbaşına tərk etdiyini etiraf edib. Sadıqov Mehdiyevin öldürülməsinin ona aidiyyəti olmadığını deyərək, törətdiyi ağır cinayət hadisəsini inkar edib.
Bildirib ki, təbii ehtiyacını ödəmək üçün səngərdən 15-20 metr aralı yerə gedib və orada olduğu müddətdə postda boğuq atəş səsləri eşidib. Onun sözlərinə görə, tələsik posta qayıdıb və Mehdiyevi yerə uzanmış halda və qan içində görüb:
"Onun düşmən tərəfindən açılan atəş nəticəsində ölməsini bildiyim üçün özümdə olan avtomat silahla düşmən tərəfə bir neçə dəfə atəş açdım. Bu vaxt digər postda xidmət aparan kiçik çavuş Taleh İsmayılov gəldi və nə baş verdiyini soruşdu. Mən də Mehdiyevin düşmən gülləsindən açılan atəşlə öldüyünü deyərək, düşmən tərəfin əsgərlərini qorxutmaq məsədilə bir neçə dəfə atəş açdım. Az sonra posta taqım komandiri və digər əsgərlər də gəldi, onlara da düşmən tərəfindən atəş açıldığını bildirdim".
Ağır Cinayətlərə Dair İşlər üzrə Hərbi Məhkəmədə bu cinayət işi üzrə davam etdirilən prosesdə şahidlər dindiriləcək.
|
