Azərbaycan türklərinin milli haqlarının təmini uğrunda yorulmaz mübariz, müəmmalı şəkildə ölən Çingiz Bəxtavərin dəfn mərasimində 30-a yaxın gənc həbs olunmuşdu. Bu günə qədər onların bir neçəsi hələ də həbsdədir.
Çingiz Bəxtavərin yaxınlarının dediyinə görə, iş yerində tək olarkən vəfat edib. Həkimlərin ilkin rəyinə görə, infarktdan dünyasını dəyişib. Ailə üzvləri isə Çingiz Bəxtavarin səhhətindən şikayəti olmadığını söyləyiblər...
Bu 53 yaşlı Azərbaycan aydını, türklərin milli haqlarının təmini uğrunda yorulmadan çalışan mühəndis dəfələrlə təzyiqlərə məruz qalmış, həbs olunmuşdu. Çingiz Bəxtavər vəfat etdiyi gün Aşurəyə düşdüyündən onun cəsədi bir gün Təbrizin Xosrovşəhr xəstəxanasındakı meyitxanada saxlanılıb. Səhəri gün məhkəmə tibb ekpertizasına aparılıb. Bəzi testlər etdikdən sonra xəstəxanadan bildirmişdilər ki, ölümün səbəbi 3 həftə və ya bir aya kimi açıqlanacaq. Ancaq indiyə kimi rəsmi ekspertiza Ç.Bəxtavərin ailəsinə bununla bağlı məlumat verməyib...
"GünazTV"nin məlumatına əsasən, İsfahan Universitetində tələbələrin nəşr etdiyi "Dan Ulduzu" jurnalının məsulu Murtəza Silab, Azərbaycan musiqisini təbliğ edən Əli Təhəmtən, Rza Əbiri bir aydan artıqdır həbsdədir. Bu azərbaycanlı gənclərin suçu milli marş oxuyub, bu matəmlə bağlı Azərbaycan xalqına başsağlığı verməsi olub. Ancaq hakimiyyət bu insanları dəfn mərasimində iştirak etməklə "hakimiyyət əleyhinə təbliğat aparmaq, qanunsuz qruplara üzvlük və milli təhlükəsizliyi pozmağa cəhd"də ittiham edir.
Mənbənin yaydığı başqa bir məlumata görə, İranın İnformasiya və Təhlükəsizlik Nazirliyi əməkdaşlarının Azərbaycan türklərinin milli-mədəni haqlarını tələb edənlərə qarşı təzyiqləri davam etməkdədir. Güney Azərbaycanın Qoşaçay (farslaşdırılaraq, rəsmi olaraq "Minandab" adlanır) rayonunda ETTELAAT məmurları Azərbaycan ziyalılarını hədələyir, onları heç bir əsas olmadan sorğu-suala çəkir. Belələrinin arasında Daryuş Əndəlibian və Peyman Xarratzadənin də olduğu barədə xəbər yayılıb. "Milli hərəkat"ın yaydığı xəbərdə bildirilib ki, Daryuş Əndəlibian bir ayda 3 dəfə ETTELAATçılar tərəfindən hədələnib. Eləcə də Peyman Xarratzadə də adı çəkilən qurumun yerli idarəsinə çağırılaraq, sorğu-sual edilib.
|
