Azərbaycandan İraqın Kərbəla şəhərinə ziyarətə gedən şiə zəvvarların avtobusu naməlum şəxslər tərəfindən atəşə tutulub. "Turan"ın yaydığı məlumata görə, hadisə yanvarın 28-də səhər saatlarında baş verib. Belə ki, avtobus karvanının qarşısını taksi ilə kəsən şəxslər avtomobildən enərək avtobuslara atəş açmağa başlayıblar. Bu atəş nəticəsində Bakının Maştağa kəndindən olan 14 yaşlı qız həlak olub, kənd sakini olan daha bir qadın və bir kişi zəvvar yaralanıb.
Məlumata görə, həlak olan qızın İraqın Nəcəf şəhərində dəfn edilməsi nəzərdə tutulur. Yaralıların müalicəsini isə İraqda qalan zəvvarlar qrupunun Azərbaycana gətirilməsini təşkil edən şirkətin öz üzərinə götürdüyü bildirilir. Qeyd olunur ki, silahlı basqın zamanı İrandan olan zəvvarlardan 27 nəfəri həlak olub.
Hadisəyə münasibət bildirən Qafqaz Müsəlmanları İdarəsi (QMİ) isə Azərbaycan vətəndaşlarını İraqdakı müqəddəs yerlərə səfər etməməyə çağırıb. QMİ-nin mətbuat xidmətinin rəhbəri Rəhimə Dadaşova deyib ki, təmsil etdiyi qurum əvvəllər Kərbəlada yerləşən müqəddəs yerlərə zəvvar səfərləri təşkil edib. Lakin İraq müharibəsindən sonra QMİ bu səfərləri dayandırıb:
"Çünki orada təhlükəsizliklə bağlı ciddi problemlər yaranıb. Biz İraqın nazirlikləri ilə əlaqə saxladıq və onlardan rəsmi formada zəvvarlarımızın təhlükəsizliyinə təminat verib-vermədiklərini soruşduq. İraqın nazirlikləri bizə təminat verə bilmədilər. Qafqaz Müsəlmanları İdarəsi vətəndaşlarımızın həyatını təhlükəyə ata bilməz. Ona görə də neçə ildir ki, İraqa zəvvar səfərləri təşkil etmirik".
R.Dadaşovanın sözlərinə görə, onların idarəsinə müraciət edən zəvvarlara da eyni cavabı verirlər. Lakin müxtəlif şirkətlər Kərbəlaya zəvvar ziyarətləri təşkil edir: "Eyni zamanda, öz təşəbbüsü ilə gedənlər var. Qafqaz Müsəlmanları İdarəsi onların təhlükəsizliyinə təminat vermir və bu səfərlərin məsuliyyətini daşımır. Hər gün ordan faciəli xəbərlər gəlir. İnsanlar belə bir səfərə yollanmazdan əvvəl yaxşı fikirləşməlidir".
|
