Əhalisinin əksəriyyətini etnik Azərbaycan türklərinin təşkil etdiyi Dərbənd şəhərində mer seçkisi mübahisəsi hələ də davam edir. Son olaraq, Dağıstan Ali Məhkəməsi Dərbəndin 3 sakininin iddiasını təmin etməyib. Onlar tələb edirdilər ki, bu şəhərin mer seçkisi martın 14-də ümumi səsvermə günü keçirilsin. Məhkəmə seçki gününü təyin etməkdən boyun qaçırıb, qeyd olunub ki, mer seçkisi gününü təyin etmək Dərbənd şəhər ərazi seçki komissiyasının hüququdur.
Məsələ belədir ki, Dağıstan prezidenti Muxu Əliyevin səlahiyyəti fevralın 20-də başa çatır, prezident seçkisi isə martın 14-nə təyin edilib. Görünür, vəziyyətin onsuz da gərgin olduğu Dağıstanda istəməyiblər ki, prezident seçkilərinə paralel olaraq Dərbənddə də mer seçkisi keçirilsin. Bunları bir-birindən ayırmaq vacib sayılıb.
Seçkilərin mart ayına təyin olunmasını mer vəzifəsinə iki keçmiş namizəd - Elxan Kazımov və Salih Ramazanov və şəhər sakini Şahban Hafizov tələb edirdilər.
Bildiyimiz kimi, şəhərdə mer seçkisi oktyabrın 11-də oldu. Həmin ərəfədə müxtəlif namizədlərin tərəfdarları arasında toqquşmalar baş vermişdi. Seçki günü üç məntəqə işləmədi. Seçki komissiyaları əməkdaşlarına təzyiqlər göstərilir, seçicilərin səsi pulla satın alınırdı. Dağıstan mediasında yer alan bilgilərə görə, bir səs - 15 min rubla satılırdı.
Odur ki, bütün bu rüsvayçılıqdan sonra Dərbənd şəhər məhkəməsi dekabrın 3-də seçkinin nəticəsini ləğv etdi. Dekabrın 28-də Dağıstan Ali Məhkəməsi bu qərarı qüvvədə saxladı.
Məsələyə RF-in ali instansiyaları qarışdılar. RF prezidenti Dmitri Medvedyev dedi ki, şəhərdə yeni seçkilər keçiriləcək.
Əlavə edək ki, Dərbənddə 100 minə yaxın seçici var. Onların 70 faizi etnik azərbaycan türkləridir. Qalan 30 faizi Dağıstan xalqlarının təmsilçiləri təşkil edir. 11 oktyabr seçkisində azərbaycanlılardan olan namizəd, hüquqşünas Hikmət İsmayılov ən yüksək çevrələrdən - Moskvadan və Mahaçqaladan edilən təzyiqlər nəticəsində namizədliyini geri götürməli oldu və mübarizə ləzgi milliyyətindən olan iki namizəd - Feliks Qaziəhmədov və İmam Yarəliyev arasında getdi. Yeni seçkilərin nə şəkildə cərəyan edəcəyi, kimlərin arasında gedəcəyi təkrar seçkinin vaxtı təyin olunandan sonra bilinəcək. Moskva istəmir ki, Azərbaycanla sərhəddə yerləşən və əksəriyyəti türklərin təşkil etdiyi bir şəhərdə mer azərbaycanlı olsun.
|
