AFFA-nın internet saytının məlumatına görə, Almaniya Futbol İttifaqı ilə AFFA arasında mövcud olan əməkdaşlıq çərçivəsində məşhur Renate Linqor Bakıya gələcək. Dünya və Avropa çempionu, Olimpiya Oyunlarının mükafatçısı olan Linqorun səfəri ölkəmizdə qadın futbolunun təbliğinə xidmət edir. Futbol veteranı səfər çərçivəsində qadınlardan ibarət Azərbaycan milli komandasının təlim-məşq toplanışında iştirak edəcək. Linqor fevralın 1-dən 5-dək Bakıda keçiriləcək hazırlıqlar zamanı öz tövsiyələrini verəcək, həmçinin məktəblərdə futbol dərsi layihəsi çərçivəsində keçirilən dərslərlə tanış olacaq.
Qeyd edək ki, 36 yaşlı xanım "Frankfurt" klubunun heyətində 2 dəfə UEFA kubokunun qalibi, 5 dəfə Almaniya çempionu, 5 dəfə Almaniya kubokunun qalibi olub. O, milli komandanın heyətində 2 dəfə dünya və 2 dəfə Avropa çempionu adını qazanıb, 2000 və 2004-cü illərdə Olimpiya Oyunlarının bürünc mükafatlarını qazanıb. Renate 2006-cı ildə "Brilyant top"a namizədlərdən biri olub.
|
