Vaqif Sadıqov: "Bambaşqa bir "Neftçi" görəcəksiz"

Azərbaycanın ən qocaman və adlı-sanlı klubu "Neftçi" hazırda özünün o qədər də yaxşı olmayan günlərini yaşayır. Azərbaycan çempionatında bir qayda olaraq qızıl medallara iddia edən "flaqman" son vaxtlar istədiyi nəticəni qazana bilmir. Komandada baş verən baş məşqçi dəyişiklikləri və aparılan islahatlar hələ ki ciddi nəticə vermir. Paytaxt klubu bu günlərdə Türkiyədə təlim-məşq toplanışını başa vurub. Klubun baş məşqçisi Vaqif Sadıqov "azerisrort.com" saytına müsahibəsində komandanın hazırlığı, yeni futbolçular və qarşıdakı planlarla bağlı açıqlama verib.

- Komandanın hazırlığından razı qaldınızmı?

- Bu təlim-məşq toplanışı "Neftçi" üçün çox dəyərli oldu. Ümumi hazırlıq keçdik və heyətə bir neçə futbolçu cəlb etdik. Yoxlama görüşlərindən də razı qaldım. Əlbəttə, səhvlərimiz də oldu, onların üzərində işlədik. Beş yoxlama matçında qüvvəmizi sınadıq. Hər matçda meydançaya fərqli heyətlər buraxdım. Bu oyunlarda qapımızdan qol buraxmadıq.

- Qış fasiləsində "Neftçi" transfer sahəsində nə kimi yeniliklər etdi?

- Komandanın hücum xəttində prolemlər vardı. Ona görə də iki hucumçunun transferini gerçəkləşdirdik. Moldovalı Sergey Alekseyev və eston Vladimir Voskoboynikovu komandaya cəlb etdik. Ruslan Abuşov və Tural Nərimanov zədəli olduqlarına görə müdafiə xəttində də çatışmazlıq var. Bu futbolçuların sıralarımıza nə vaxt qayıdacağı məlum deyil. Buna görə də Valeri Abramidzeni komandaya götürdük.

- "Neftçi" transfer fəaliyyətini bununla da başa çatdırıb?

- Ola bilsin, bir futbolçu aldıq. Yaxın günlərdə ikitərəfli oyun keçirəcəyik. Daha bir yarımmüdafiəçi almaq istərdik.

- Vaxtilə "Neftçi"də çıxış etmiş və hazırda klubsuz olan Branimir Subaşiç maraq dairənizdə deyil ki?

- Eşitdiyimə görə, Türkiyə klublarından birində oynamağa hazırlaşır. Branimir Subaşiç bizə yad adam deyil. Ona uğurlar arzulayırıq.

- Görmək istədiyiniz heyəti formalaşdıra bilmisinizmi?

- Heyəti istədiyim kimi formalaşdırmışam. Qısa müddət ərzində komandanın bütün problemlərini yoluna qoymaq mümkün deyil. Biz bilirik ki, geriyə yol yoxdur. Komandaya inam olmalıdır. Biz çempionatın birinci dövrəsində qalan oyunların hamısını yüksək səviyyədə keçirməyə borcluyuq. Hər oyuna son matç kimi çıxacağıq. Başqa yolumuz yoxdur. Hər oyunda qazanacağımız xallar bizim üçün qızıla bərabər tutulacaq. Fevralda bambaşqa "Neftçi" görəcəksiz.