Mərkəzləşdirilmiş sənədli televiziya birliyinin yaradılmasına zərurət var. Bu fikri yaxın günlərdə yaradılan təşəbbüs qrupu üzvləri bildiriblər. Qrupun adından çıxış edən jurnalist Vüqar Tapdıqlı qeyd edib ki, dövlətin vəsaiti və sifarişi hesabına hazırlanan sənədli televiziya filmləri əksər halda bir kanalın mülkiyyətinə çevrilir. Bu filmlər hansı kanalda istehsal olunursa, müəlliflik və mülkiyyət hüququ da həmin kanala məxsus olur:
"Ancaq sənədli filmlərin ictimai əhəmiyyəti ondan ibarətdir ki, o həm də tarixdə salnamə funksiyasını yerinə yetirir. Bu səbəbdən təşəbbüs qrupu üzvləri hər bir kanalda sənədli televiziya filminin çəkilməsini vacib hesab edir. Burada söhbət dövlət vəsaiti və dövlət sifarişi ilə çəkilən filmlərdən gedir. Eyni zamanda çəkilən filmlərin tirajlanıb bir yox, bütün kanallarda əvəzsiz nümayiş olunmasına şərait yaradılmalıdır".
Vüqar Tapdıqlı hesab edir ki, dünyanın hər bir yerində sənədli telefiziya filmləri dövlətçiliyə bağlıdır. Bu səbəbdən mərkəzləşdirilmiş dövlət sənədli televiziya filmləri birliyi yaradılarsa, bütün kanalların yaradıcı nümayəndələri də orada təmsil oluna bilərlər. Onun fikrincə, qurum Baş Arxivlər Birliyinin nəzdində, yaxud əsasnaməsinə görə, Milli Teleradio Şurasının nəzdində fəaliyyət göstərə bilər.
Ramiz Mehdiyevin məlum məqaləsini xatırladan V.Tapdıqlı orada iki yerdə sənədli televiziya filmlərinin inkişaf etdirilməsinə toxunulduğunu vurğulayıb:
"Sadəcə, o, fikrini prodakşnlar haqqında bildirib. Sənədli filmlər milli ideologiyanın tərkib hissəsidir. Amma bu sahədə bir boşluq görürəm. Yəni kənd təsərrüftı, hərbi vətənpərvərlik, təhsil və s. sahələrdə sənədli filmlər olduqca az istehsal olunur. Bu sahə Milli Televiziyada redaksiya kimi fəaliyyət göstərir. Təşəbbüs qrupunun mövqeyi belədir ki, filmlər tirajlanmalı və yayılmalıdır. Təbliğatı genişləndirilməlidir. Bu səbəbdən Sənədli Televiziya Birliyinin yaradılmasına zərurət var".
|
