Müdafiə Nazirliyinin "N" saylı hərbi hissəsinin hərbi qulluqçuları - kiçik çavuş Nicat Abbasov, əsgərlər - Emin Alıyev və Sənan Behbudovun məhkəməsi başa çatdı.

İttihama görə, təqsirləndirilən şəxslər 2009-cu il mayın 9-da hərbi hissənin ərazisində əsgərlər - Turan Eldarov və Ramiz Qasımovun məzuniyyətdən qayıtdıqlarını biliblər və onlara hədə-qorxu gələrək, pul tələb ediblər. Onların tələblərinə əhəmiyyət verməyən hər iki əsgəri döyərək, işgəncə veriblər.

Bundan başqa, təqsirləndirilən şəxslər mayın 29-da əsgər Nadir Məmmədovdan "Nokia" markalı mobil telefonunu tələb ediblər. Sonuncu mobil telefonunu evlərinə göndərdiyini dedikdə, onlar günün sonuna kimi 20 manat pul verməsini tələb ediblər, mobil telefonunu gətizdirməsi üçün isə bir həftə vaxt veriblər. Əks halda onu şəxsi heyətin qarşısında alçaldacaqlarını bildiriblər. Zərərçəkmişlərin şikayətindən sonra təqsirləndirilən şəxslər həbs edilib.

Ağır Cinayətlərə Dair İşlər üzrə Hərbi Məhkəmənin hökmü ilə Nicat Abbasov 6 il, Emin Alıyev 4 il 6 ay, Sənan Behbudov 1 il müddətinə azadlıqdan məhrum ediliblər.