Dövlət Neft Şirkəti 2009-cu ildə olduğu kimi, bu il də idarəetmə sistemində dünya böhranının təsirlərini nəzərə alacaq və ehtiyatlı olmağa çalışacaq. Şirkət 2009-cu ildə hazırladığı Antiböhran Proqramının tələblərini qüvvədə saxlayacaq. Neftin qiymətinin 80 dollara çatmasına baxmayaraq, DNŞ 2010-cu ildə bir sıra sahələrə pul xərcləməkdə qənaət edəcək. Bunun səbəbi sadədir: qlobal böhran hələ başa çatmayıb və mümkün neqativ hallarla üzləşməmək üçün indiki şəraitdə ehtiyatlı addımlar atmaq zəruridir.
DNŞ mütəxəssislərinin qənaətincə, neftin qiyməti təhlükəli həddən kənara çıxsa da, 2009-cu ilin birinci yarısında dünya bazarında neftin qiymətinin üç dəfədən artıq aşağı düşməsi şirkətin büdcəsinin gəlirlər hissəsində müvafiq azalma ilə müşayiət olunub. Ona görə DNŞ ötən il yarana biləcək əlverişsiz şəraitə hazırlığı yüksəltmək, ümumdünya maliyyə və iqtisadi böhranı ilə əlaqədar idarəetmə sistemini daha da təkmilləşdirmək və şirkətin normal fəaliyyətini təhlükə altına ala biləcək tendensiyalara qarşı tədbirlərin səmərəliliyini artırmaq baxımından bir sıra addımlara əl atmağa məcbur olub. Bu siyasət 2010-cu ildə də davam etdiriləcək.
Antiböhran Proqramının tələblərinə əsasən, bu il də DNŞ-nin əsas fəaliyyət sahələri üzrə məsrəflərin və özəlliklə qeyri-istehsal sahələrinə ayrılan xərclərin maksimum azaldılması, idarəetmənin təkmilləşdirilməsi, xərclərin optimallaşdırılması istiqamətində struktur dəyişikliklərinin aparılması, debitor və kreditor borcların restrukturizasiyası və s. tədbirlər nəzərdə tutulur.
Qeyd edək ki, ötən ilin əvvəllərindən etibarən DNŞ sistemində olan bəzi idarə, birgə müəssisə, alyans və digər strukturlarda təqaüd yaşı tamam olmuş işçilərlə müqavilə bağlanması qadağan olunub. Məlumatlara görə, "Azşendli oyl", "Qobustan ÜŞ", "Binəqədi Oyl Kompanu", "Salyan Oyl", "Qarasu Oyl" və digər müəssisələrdə 500-dən çox işçi ixtisar olunub.
Neft sənayesində çalışanların bilgilərinə görə, dənizdə yüksək maaş alan işçilərə hər rüb verilən maaşa əlavələr, iş vaxtından artıq çalışanlara yazılan əməkhaqları, yemək xərcləri üçün verilən vəsaitlər, yardımlar ləğv olunub. Bundan başqa, quruda neftçıxarma idarələrinin yüksək maaş alan işçilərinə də yuxarıda qeyd olunan güzəştlərin əksəriyyəti dondurulub. On üçüncü əməkhaqqı da dondurulub. Bu güzəştlərin 2010-cu ildə bərpa olunması gözlənilmir.
Bundan başqa, ötən il olduğu kimi, bu il də DNŞ-nin idarə və müəssisələrində çalışan işçilərin sosial rifahının yaxşılaşdırılması məqsədilə qəbul olunmuş Sosial-İnkişaf Proqramında nəzərdə tutulan tədbirlərin bəziləri təxirə salınacaq. Bu sıradan - neft sənayesində çalışan işçilərin mənzillə təmin edilməsi hələ bir müddət də dayandırılacaq. Neftçilərin istirahəti üçün verilən göndərişlərin də ləğvi istisna olunmur.
...Hər il minlərlə neftçi Nabran qəsəbəsində yerləşən "Geofizik" istirahət zonasında şirkətin hesabına istirahət edirdi. Bundan başqa, Neft və Qaz Sənayesi İşçiləri Həmkarlar İttifaqının Respublika Komitəsi 30 min nəfərə yaxın neftçinin və onların ailə üzvlərinin 2-3 günlük və çoxgünlük istirahətlərini təşkil edir, minə yaxın işçini sanatoriya-kurort müalicəsi üçün yollayışlarla təmin edirdi. Maliyyə sıxıntısının davam etməsi şirkəti 2010-cu ildə də bu cür güzəştləri dayandırmağa vadar edir.
|
