Yanvarın 20-də Bakıda, ölkənin digər şəhərlərində, rayonlarında şəhid məzarlarını ziyarət edən izdihama Azərbaycanda yaşayan iranlı mühacirlər və onların ailə üzvləri də qoşulacaq. İranlı mühacirlər dedikdə, 1946-cı il və ondan sonrakı dönəmlərdə İranda şah rejimindən qaçaraq bizim torpağa pənah gətirmiş İran vətəndaşları, əksərən İran türkləri və azərbaycanlılar idilər. Fars milliyyətindən olanlar ilk imkan düşən kimi Avropaya yollanırdılar. Türklər isə Şimali Azərbaycanı doğma bilərək burada qalmağa üstünlük verirdilər. Onlar Azərbaycan Demokrat Firqəsi və İranlı Mühacirələr Cəmiyyəti ətrafında birləşmişlər və bizim toplumun ayrılmaz hissəsidirlər.
İranlı Mühacirlər Cəmiyyətinin sədri Əmirəli Lahrudinin verdiyi izahata görə, onlar Azərbaycanın müstəqilliyi uğrunda canlarını fəda etmiş insanların, həmçinin respublikanın ərazi bütövlüyünün qorunması naminə döyüşlərdə həlak olanların da məzarları, şərəflərinə ucaldılan abidələr önünə tər qərənfillər düzəcək, ölməz əməllərinə ehtiramlarını bildirəcəklər.
Onun sözlərinə görə, işğalçı erməni təcavüzünə məruz qalmış Dağlıq Qarabağ camaatı ilə birlikdə Xocalı, Şuşa və Ağdamda məskunlaşan iranlı mühacirlərə qarşı da vəhşiliklər törədilib: "24 nəfər öldürülüb, 18-i yaralanıb, 200 mühacir ailəsi özlərinin ikinci yurd-yuvalarından didərgin düşüb".
İranlı Mühacirlər Cəmiyyəti fevralın ikinci ongünlüyündə keçiriləcək tədbirdə Xocalı faciəsi qurbanlarının xatirəsini də yenidən anmaq niyyətindədir.
|
