Bakının Nərimanov rayonunda iş adamının evinə silahlı basqın olub, evdən külli miqdarda pul və qızıl-zinət əşyaları götürülüb. Bu barədə APA-ya Nərimanov rayon Polis İdarəsindən məlumat verilib.
Hadisə ötən gecə rayonun Aşıq Alı küçəsi 5 ünvanında qeydə alınıb. Hündürmərtəbəli yaşayış binasının 7-ci mərtəbəsində yerləşən 45 saylı mənzilə daxil olan naməlum şəxslər ev sahibəsi Çimnaz Əsədova və ailənin sürücüsü Anar Əzizovun zor tətbiq etməklə əl-ayağını, ağzını və gözlərini bağlayıb. Daha sonra ev sahibəsinə işgəncə verərək onu silahla hədələyən şəxslər onlardan pul tələb ediblər. Basqınçıların işgəncəsinə dözməyən qadın evdə olan bütün pulları və xeyli miqdarda qızıl-zinət əşyalarını onlara vermək məcburiyyətində qalıb. Basqınçılar külli miqdarda pulu və qızıl-zinət əşyalarını alaraq hadisə yerindən qaçıblar.
Bu barədə polisə məlumat daxil olan kimi dərhal əməliyyat qrupu yaradılıb. Hazırda polis hadisəni törədən şəxslərin tapılması istiqamətində əməliyyat-axtarış tədbirlərini davam etdirir.
Polis idarəsindən həmçinin bildirilib ki, sözügedən mənzilin sahibi iş adamıdır.
Faktla bağlı Nərimanov rayon Polis İdarəsi istintaq şöbəsində CM 181.2.1-ci (quldurluq - qabaqcadan əlbir olan bir qrup şəxs tərəfindən törədildikdə), 181.2.3-cü (quldurluq - yaşayış sahəsinə, habelə binaya, anbara və ya başqa saxlanc yerlərə qanunsuz olaraq girməklə törədildikdə) və 181.2.4-cü (quldurluq - zərərçəkmiş şəxsə xeyli miqdarda ziyan vurmaqla törədildikdə) maddələri ilə cinayət işi başlanıb, araşdırmalar davam etdirilir.
|
