Qazax rayonu ərazisində qoşunların təmas xəttindəki Qızılhacılı kəndinin qəbiristanlığında erməni tərəf vandalizm əməli törədib. Bu barədə APA-ya Qazax rayon Polis Şöbəsinin rəis müavini Ədalət Sadıqov məlumat verib. Sözügedən kənd qarşı tərəfin atəş məsafəsində yerləşdiyindən və kənd hərbi əməliyyatlar nəticəsində xaraba qaldığından sakinlər orada yaşamır. Lakin kənd ətrafında bizim mövqelərimiz yerləşir. Erməni mövqeləri də yaxındır. Sadıqov deyib:
"Kənd, qəbiristanlıq bizim nəzarətimiz altındadır. Həmin kəndin sakinləri rəhmətə gedən yaxınlarını da orada dəfn edirlər. Yanvarın 7-dən 8-nə keçən gecə kənd qəbiristanlığı naməlum şəxslər tərəfindən dağıdılıb, 30-dan çox məzarın baş daşı sındırılıb".
Rəis müavini vandalizmi ermənilərin törətdiyinə şübhə etmədiklərini söyləyib.
Ə.Sadıqov faktla bağlı araşdırmaların davam etdirildiyini sözlərinə əlavə edib.
Birinci Qarabağ müharibəsi əlili, ehtiyatda olan zabit Namiq Əliyev ANS-ə bildirib ki, məzarlıqda təqribən 50 məzar dağıdılıb. Məlumata görə, srağagün dəfn edilən bir nəfərin məzarının üzərinə isə taxtadan hazırlanmış xaç işarəsi qoyulub.
"Qazax rayonunun Qızılhacılı kəndində nə baş verdiyini araşdırırıq. Bu barədə indidən konkret fikir söyləmək olmaz. Kənd qəbiristanlığında nə baş verdiyini, hadisəni kimin törətdiyini araşdırmalardan sonra açıqlayacağıq".
Bu sözləri isə APA-ya açıqlamasında Qazax rayon İH başçısı Rauf Hüseynov deyib. İcra başçısı bildirib ki, dəlil-sübutlar dəqiqliklə yoxlanılmadan nəsə demək tezdir. Onun sözlərinə görə, Qızılhacılı kəndi 1992-ci il mayın 11-də Ermənistan Silahlı Qüvvələri tərəfindən işğal olunub: "Ermənilər bu kəndi işğal etdikdən sonra yandırıblar. Qəbiristanlıq isə kəndin kənarından keçən magistral yolun yaxınlığındadır".
R.Hüseynov atəşkəs rejiminin ermənilər tərəfindən mütəmadi pozulduğunu da diqqətə çatdırıb.
|
