Dünyada - Ayna.az

Ötən ilin yekununda çeşidli hesabatlar sırasında Beynəlxalq Əfv Təşkilatının insan haqları ilə bağlı bəyanatı da vardı. Bəyanatda deyilirdi ki, İranda insan haqlarının durumu son 20 ildə ən pis həddə çatıb.

"Azadlıq" radiosunun bu haqda yaydığı xəbərə əsasən, hesabatda 2009-cu ilin iyun prezident seçkisindən əvvəl və sonra "insan haqlarının pozulma dövrü" təsvir olunub. Qurum hakimiyyəti bu təzyiqlərə cavabdehlərin məsuliyyətə cəlb edilməsinə çağırır.

İrandan çıxarıldıqdan sonra Londonda yaşayan Bi-Bi-Si-nin Tehran üzrə müxbiri Con Layn bildirib ki, Mahmud Əhmədinejadın mübahisəli şəkildə seçilməsindən sonra müxalifət sistematik olaraq repressiyalara məruz qalır.

Hesabatda nümayişlərin zorakı şəkildə dağıldığı və İran cəmiyyətinin bütün təbəqələrində insan azadlığına məhdudiyyətlər qoyulduğu qeyd edilib. Beynəlxalq Əfv Təşkilatı zorakılıqlar arasında müxalifətçilərin məhbəsdə zorlanması hallarına diqqəti çəkib.

Qurum jurnalistlərin və müxalifətçilərin məhkəmə prosesinin ədalətli keçmədiyində israr edir. Nümayişlər zamanı baş vermiş bir sıra qanun pozuntularını İranın ali rəhbəri Əli Xamneyi də qəbul etmişdi. Elə Kəhrizək adlı bədnam təcridxananın qapadılması barədə onun əmr verməsi bu etiraflara örnək hal kimi yadda qaldı. Amma bu o demək deyildi ki, bundan sonra tənqidlər eşidiləcək. Xeyr. İran hakimiyyəti əvvəlki kimi hələ də tənqidə dözümsüzlük nümayiş etdirir. Özü də bunu dünyada ən kobud bir üslubda nümayiş etdirməkdədir.