Azərbaycanın "Eurovision-2010" mahnı müsabiqəsindəki təmsilçisinin müəyyənləşməsi üçün seçim turları davam edir. Bu barədə İctimai Televiziya və Radio Yayımları Şirkətinin mətbuat xidmətindən məlumat verilib. Xəbərdə qeyd olunur ki, İctimai Televiziya və Radio Yayımları Şirkəti tərəfindən ciddi hazırlıqlar görülüb, ölkəmizi layiqincə təmsil etmək üçün bir sıra addımlar atılıb. "Eurovision" müsabiqəsinin Azərbaycan üzrə nümayəndə heyətinin rəhbəri Adil Kərimli İctimai Televiziya tərəfindən bir neçə seçim turunun keçirildiyini, seçim turlarında iştirak edən 30-dan artıq gənc ifaçının video yazılarının yerli və xarici mütəxəssislər tərəfindən qiymətləndirildiyini deyib: "Belə bir nəticəyə gəldik ki, yarımfinal mərhələsində final üçün iştirakçılar seçilsin". Qeyd edək ki, yarımfinal mərhələsində 6 nəfər - Azad Şabanov, "Milk & Kisses" qrupu, Məryəm Şabanova, Səfurə Əlizadə, Elli və Ülviyyə Rəhimova iştirak edəcəklər. Öyrəndik ki, bu mərhələ televiziya və internet vasitəsi ilə yayımlanacaq. Yarımfinal mərhələsi fevral ayının 2-də "Buta Palace"də keçiriləcək. Seçim tam olaraq "Eurovision" formatı ilə təşkil olunacaq. Belə ki, iştirakçılara mahnını ifa etmək üçün cəmi 3 dəqiqə vaxt veriləcək və səhnədə maksimum altı nəfərin olması mümkün olacaq. İctimai Televiziyanın "Eurovision" həvəskarlarına bir hədiyyəsi də var. Xəbər verdiyimiz kimi, bu dəfə yarımfinal mərhələdə gənclərimizə dəstək olmaq üçün 2004 "Eurovision" beynəlxalq mahnı müsabiqəsinin qalibi Ruslana və 2009 "Eurovision" beynəlxalq mahnı müsabiqəsinin qalibi Aleksandr Rıbak və Azərbaycanın 2009 "Eurovision" beynəlxalq mahnı müsabiqəsinin təmsilçisi Aysel Teymurzadə də iştirak edəcəklər. Xatırladaq ki, bu layihə Heydər Əliyev Fondu və Gənclər və İdman Nazirliyinin dəstəyi ilə Azərbaycanın İctimai Televiziya və Radio Yayımları Şirkəti tərəfindən həyata keçirilir. Azərbaycan 2008-ci ildən müsabiqədə təmsil olunur.
Yeri gəlmişkən onu da bildirək ki, "Eurovision-2010" müsabiqəsinə qatılan 39 ölkənin adı açıqlanıb. Müsabiqənin rəsmi saytında yazılıb ki, Albaniya, Azərbaycan, Ermənistan, Belarus, Belçika, Bosniya və Herseqovina, Bolqarıstan, Xorvatiya, Kipr, Danimarka, Estoniya, Finlandiya, Fransa, Makedoniya, Gürcüstan, Almaniya, Yunanıstan, İslandiya, İrlandiya, İsrail, Latviya, Litva, Malta, Moldova, Niderland, Norveç, Polşa, Portuqaliya, Rumıniya, Rusiya, Serbiya, Slovakiya, Sloveniya, İspaniya, İsveç, İsveçrə, Türkiyə, Ukrayna, Böyük Britaniyanın təmsilçiləri mayda Norveçdə keçiriləcək Avropa mahnı yarışmasında iştirak edəcək. Fransa, Almaniya, İspaniya və Böyük Britaniya mexaniki olaraq finalda yarışacaqlar. Çünki onlar "Eurovision" müsabiqəsinin əsas sponsorlarıdır.
|
